KNAPK-p akerliussutsimik takutitsinera: Sakkulisartoqassasoq kaammattuisoqarpoq
Pingasunngornermi KNAPK-p akerliussutsimik takutitsinerani politiit takussaalluarput. Akerliussutsimik takutitsineq tamaat drone atorlugu immiuppaat. Sermitsiaq.AG-p ilisimatinneqarnera naapertorlugu tamanna ilaatigut pissuteqarsinnaavoq sakkulisarluni akerliussutsimik takutitsiutigaluni pikitsitsisoqarnissaanik kaammattuisoqarsimaneranik.
Pingasunngornermi nunatsinni aalisartut amerlasuut saarulliit kilomut akii appasippallaarnerarlugit aqqusinermi ingerlaarput eqqissillutik pissuserissaarlutillu akerliussutsimik takutitsillutik. Taamaattorli akerliussutsimik takutitsisut ilaasa eqqissilluni isummamik nittarsaassisoqarnissaa naammagisimanngilaat.
Sermitsiaq.AG paasissutissanik uppernarsaatitalinnik innersuunneqarpo akerliussutsimik takutitsinissaq sioqqullugu sakkulisartoqassasoq kaammattuisoqarsimasoq sakkortuumillu qisuariartoqassasoq "umiarsualivinnik pikitsitsilluni matooraasoqassasoq". Kaammattuut taanna Facebook aqqutigalugu saqqummersinneqarsimasoq akerliussutsimik takutitsineq sioqqullugu inunnit amerlasuunit ingerlateqqinneqaqattaarsimalluni.
Akerliussutsimik takutitsinermi kingornalu politiet ersarilluarput
Akunnaallisikannerlugu Nuummi akerliussutsimik takutitsisut 200-300-llu akornannik amerlassuserqarput, ingerlaaqatigiinnerlu torersumik ingerlanneqarpoq, taamaalillunilu malittarisassat taamaattunik aaqqissuussinerni malinneqarlutik.
Arlallilli maluginiarsimassavaat, politiit ersarilluartut, aammalu akerliussutsimik takutitsinermi kingornalu pisunut malinnaalluartut. Akerliussutsimik takutitsisut biilillu sanioqquasut aqullugit aqqutissiuussipput, allallu politiit drone atorlugu pisumi immiussipput. Taamatuttaaq akerliussutsimik takutitsinerup kingorna Nuummi katersortarfimmi kaffisoqatigiittoqarnerani aamma takussaalluarput.
Tamannami pissutissaqarluarsimasinnaasoq kingorna paasinarsivoq.
Tassami akerliussutsimik takutitsineq sioqqullugu kissassernermi ilaat oqaasissaminnik piareersaasut, ilaat torlulaartaat atorlugu suaartartut. Taamaattorli ilaat aamma "sakkortuumik pikitsitsisoqarnissaanik" ammalu sakkulisartoqarnissaanik kaammattuisimasut.
Allakkami assilisami ataani atuarneqarsinnaavoq qanoq kaammattuisoqarsimanersoq.
Politiit kaammattuut nalunngereerpaat
Sakkulisartoqarnissaanik tigussaasumik kaammattuuteqartoqarsimanera, Kalaallit Nunaanni Politiit akerliussutsimik takutitsisoqalinnginnerani ilisimareersimavaat.
Tassami politiit paasissutissiisarfianit Sermitsiaq.AG-mut ilisimatitsissutigineqarpoq akerliussutsimik takutitsisoqarnera sioqqullugu taamatut kaammattuuteqartoqarsimasoq pillugu nalunaarutiginnittoqarsimanngikkaluartoq, kaammattuut namminneq ilisimareersimagaat.
- Akerliussutsimik takutitsinissamut tunngatillugu nalunaarutinik allanik aamma tigusaqanngilagut – taamaallaat sinerissami illoqarfinni assigiinngitsuni qulingiluani siumoortumik akerliussutsimik takutitsinissamik nalunaarutiginninnerit kisiisa tigunikuuagut. Ataatsimut isigalugu Kalaallit Nunanni Politiinit ilisimatitsissutigisinnaavarput, akerliussutsimik takutitsinerit torersumik ingerlanneqarmata, peqataasut, isiginnaartut innuttaasullu allat tamarmik torersumik ingerlaaqatigiittoqarnerani takutitsipput, politiit paasissutissiissarnermut suliaqartuat Nadja Ankerfelt Rasmussen Sermitsiaq.AG-mut oqarpoq.
Naalakkersuisut akerliussutsimik takutitsisunut anillannissaminnut nangaaqqaarsimapput
Sermitsiaq.AG tusarfinnit tutsuiginartunit ilisimatinneqarpoq aammalu uppernarsillugu Naalakkersuisut akerliussutsimik takutitsineq nalliliivissoq ilisimatinneqarsimasut akerliussutsimik takutitsinermi sakkulisartoqarnissaanik kaammattuuteqartoqarsimasoq.
Tusarfitsinnit ilisimatinneqarpugut sillimaniarneq eqqarsaatigalugu Naalakkersuisut tungaannit akerliussutsimik takutitsisut anillaffigineqassanersut isumaliutigilluarneqaqqaarsimasoq, politiilli najuulluarnerat pissutaasimagunarluni qinikkat anillallutik tusarnaarlutillu oqaaseqarput.
KNAPK-mit oqaaseqartitsiniarluta Sermitsiaq.AG-mit sulissutigaarput.