KNAPK qaleralinnut tunngatillugit aalajangernermut isornartorsiuisoq
Qaleralinniarnerup siumut nalunaaruteqaqqaarani matuneqarnera iluaqutaanngilaq, tamannami aalisartorpassuarnut asuli nukinnik atuineruvoq, aalisartut piniartullu kattfuffiannit isornartorsiuineq taamatut nipeqarpoq.
Aalisarnermut, Piniarnermut Nunalerinermullu Naalakkersuisoqarfiup oktobarip 28-ani nalunaarutigaa, Qeqertarsuup Tunuani Uummannamilu qaleralinniarneq unitsinneqartoq.
Unitsitsineq ullormi nalunaarfiusumi unnuap-qeqqanut atuutsinneqalerpoq.
- Ulloq tanna avammut nalunaaruteqarluni ullorlu taanna naappat aalisarneq tunisinerlu matussasut ileqqorissaarnerunngilluinnarpoq, periuserlu taanna avoqqaarilluinnaratsigu matumuuna APNN-imut apuupparput, aalisartut piniartullu kattuffiat KNAPK tusagassiorfinnut nalunaaruteqarnermi allappoq.
KNAPK naapertorlugu, kattuffiup naalakkersuisoqarfimmut isumaqatigiissutigisimavaa, aalisarnermik matusisoqassatillugu sapinngisamik ullut suliffiit pingasut siumut piffissaliisoqartassasoq, aalisarnerup pitsaasumik unitsinneqarnissaa ajunngitsumik ingerlasinnaaqqullugu.
- Taamaaliunngikkutami kingunerisarpaa aalisartup inuutissarsiumminik ingerlatsinera ajoquserujussuarneqartarmat, ilaatigut aalisarnermi atortunik sulineq, soorlu neqitsersuineq asuliinnaq pisarmat, soorlumi tamanna maanna erseqqaarilluinnartumik naammattooripput, KNAPK allappoq.
Naalakkersuisoq matusineq pillugu siunersiueqateqarniartoq
Kattuffimmit aamma innersuussutigineqarpoq, aalisartut ulluni arlalinni imaani aalisareersimallutik angerlamut tikikkaangamik pisarimminnik tunisinissamut periarfissaaruttarsimasut, tunitsiviit qaleralinnik pisiaqarsinnaajunnaarsimanerat pissutigalugu.
Sermitsiaq.AG-mit isornartorsiuineq pillugu naalakkersuisoqarfik oqaaseqartinniarneqaraluarpoq, maannamulli suli iluatsinngitsumik.
Qaleralinniarnermik matusineq Inatsisartuni ataasinngorpat ualikkut ammasunik siunersiueqatigiinnissami sammineqartussaavoq.
Aalisarnermut, Piniarnermut Nunalerinermullu Ataatsimiititaliaq tassaavoq aalisarnermut naalakkersuisumik Jens Immanuelsenimik suliaq pillugu siunersiueqatigiinnissamut qaaqqusisimasoq.
Illuatungiliuttut partiiannit Inuit Ataqatigiinnit ilaatigut isornartorsiorneqarsimavoq, Qeqertarsuup Tunuani oktobarip qaammataanut pisassiissutigineqarsimasut tamakkerlugit pisarineqareeraluartut naalakkesuisup aalisarnermik matusisimannginnera. Oktobarip 28-ani aalisarneq matuneqarmat, ukiup sinneranut pisassiissutit sinnilaarlugit pisarineqareersimapput.