KNAPK: Sakkulisartoqarnissaanik kaammattuineq kattuffimmit illuatungilerneqarpoq
KNAPK-mi ilaasortat ilaat "sakkulisarluni sakkortuumik pikitsitsinissamik" kaammattuuteqarsimanera maanna kattuffimmit qisuariarfigineqarpoq. - Kattuffimmiit taamatut eqqarsartoqarnera arlaannaatigulluunniit isumaqatigineqanngilaq, KNAPK-mi pisortaq Vittus Qujaukitsoq erseqqissaavoq.
1. november aalisartut isummaminnik ataatsimoorlutik akerliussutsimik takutitsinermikkut nittarsaassipput, akerliussutsimillu takutitsineq, KNAPK-mit aaqqissuunneqartoq nuna tamakkerlugu ingerlanneqarmat aalisartorpassuit peqataapput mange fiskere deltog i den landsdækkende demonstration, der er arrangeret af KNAPK.
Akerliussutsimik takutitsinermi pingaarnertut aalisartut ersersinniarpaat saarullinnut kilomut akigitinneqartoq isumaqatigineqanngimmat. Tamatumalu saniatigut kattuffimmiit unammilleqatigiinnermut aqutsisoqarfimmut suliassamik tunniussisoqarnikuuvoq nunatsinni aalisartitseqatigiiffiit anginerit imminnut unammillernatik unioqqutitsillutik aalisakkat akiinik isumaqatigiissuteqartarnersut misissorneqaqqullugu.
Taamaakkaluatoq aamma aalisartut ataasiakkaat inuit attaveqaqatigiittarfiisigut siammarterinermikkut maluginiarneqarput. Pingaartumik ataaseq maluginiarneqartoq aaqqissuisoqarfimmut apuunneqarpoq. Politiit aamma Naalakkersuisut akerliussutsimik takutitsineq suli pinngitsoq inuup taassuma kaammattuutaa aamma takoreersimavaat, taannami "sakkulisarluni sakkortuumik umiarsualivinni pikitsitsinissamik" kaammattuuteqarpoq.
Sermitsiaq.AG-mut apuunneqartut naapertorlugit, aalisartoq nalinginnaasumik aalisartuuinnanngilaq, aammali KNAPK-p immikkoortortaqarfiisa ilaanni siulittaasutut inissisimasuuneragaavoq.
Inatsisit pissuserissaarnissarnissamillu malittarisassat malinneqassapput
KNAPK-mi pisortaq, Vittus Qujaukitsoq erseqqissaavoq kattuffik naammagisimaarinnittoq akerliussutsimik takutitsinerup pingasunngornermi 1. november 2023 ingerlanneqarsimanera pillugu.
- KNAPK-miit pingasunngornermi ulloq 1. november 2023-mi akerliussutsimik takutitsineq ataatsimut isigalugu iluarisimaarneqarpoq, Nuummiinnaanngitsoq, kisianni nunarput ataatsimut isigalugu.
- Kattuffimmiit Kalaallit Nunaanni Politiit qanimut tatigeqatigiissumillu suleqatiginerat iluarisimaarneqarpoq, taamatullu akerliussutsimik takutitsinerit eqqissisimasumik torersumillu ingerlanneqarmata.
- Akerliussutsimik takutitsinerit pillugit qanimut oqaloqatigiinnerit ingerlanneqarput, aamma kattuffimmiit immikkoortortaqarfiit sinniisullu inatsisit ileqqorissaarnissarlu kaammattuutigineqarput.
- Politiit akerliussutsimik takutitsinerit nuna tamakkerlugu eqqissisimasumik ajornartorsiuteqarfiunngitsumillu ingerlanerannik naliliinerat isumaqatigaarput, aamma politiit pitsaasumik suleqatiginerat qujassutigaarput, Vittus Qujaukitsoq erseqqissaavoq.
Kaammattuuteqartoqarsimanera oqaaseqarfigineqarusunngilaq
Vittus Qujaukitsoq ilanngullugu erseqqissaavoq sakkulersortoqarnissaanik kaammaattuuteqartoqarsimanera pillugu KNAPK oqaaseqarnianngitsoq, taanna kaammattuut akerliussutsimik takutitsinissaq sioqqullugu inuit 100-it sinnerlugit amerlassusillit ingerlateqqeqattaarpaat:
- KNAPK-miit sakkulersornissamik aammalu aserorterinissamik kaammattuuteqarnermut oqaaseqassanngillat, kattuffimmiit taamatut eqqarsartoqarnera arlaannaatigulluunniit isumaqatigineqanngimmat. Demokrati naapertorlugu pisinnaatitaaffiit inatsisitigut eqqortumik atorneqartariaqarput.
Vittus Qujaukitsoq qisuariaammini aamma erseqqissaavoq KNAPK taamaallaat kaammattuuteqarsimasoq akerliussutsimik takutitsinerit eqqissisimasumk ingerlanneqassasut.
- Kattuffimmiit aalisartut piniartullu akornanni aalisakkanik tunisinermut akit appasippallaarnerat pillugu erloqisoqarnera paasilluarneqarpoq, kisianni demokratip aqqani pisinnaatitaaffivut pisussaaffivullu inatsit ileqqorissaartumillu atorneqartariaqarput. Najukkani ataasiakkaani nunalu tamakkerlugu, KNAPK-mi pisortaq Vittus Qujaukitsoq kattuffik sinnerlugu erseqqissaateqarpoq.