KNR digitaliserinissamut 2 milliuuninik tunineqartoq
A.P. Møller-ip Aningaasaateqarfia KNR-ip toqqorsivianiit digitaliserinissamut 2 milliuunit koruuninik tunissuteqarpoq.
KNR-imi TV-mik isiginnaagassianik radiokkullu tusarnaagassianik digitaliseriineq sukkanerulertussanngorpoq, Aningaasaateqarfik A. P. Møllerip aningaasaleereerneratigut.
KNR-ip pisortaa Karl Henrik Simonsen tusagassiorfinnut taama nalunaaruteqarpoq.
- Taakkua aallakaatitassiat kalaallit inuisa aamma Naalagaaffeqatigiinnerup iluata sinnerani
oqaluttuarisaanermi toqqortat piunnarnissaat qulakkeerneqassapput, ullummikkut tamanut
ammanngitsunik, KNR tusagassiorfinnut nalunaarutimini allappoq.
Immiussat nutaanngiliartornerini oqummillu eqqugaasoqartarnerini KNR-ip immiussanik aserfallatsaaliiniarnermini unammillerneqartarpoq.
Immiussat 14.000-it digitalisererneqassapput
KNR ilisimatitsivoq immiussat arlalippassuit digitalisererneqareersimasut. TV-kkulli isiginnaagassiat 9.000-it radiokkullu tusarnaagassiaq 5.000-it suli digitalisererneqanngillat. Aningaasaliisoqarneratigut suliarinnittussat ilaneqassapput, isiginnaartartut tusarnaartartullu digitaliusumik atuisinnaanerat annertunerulersinneqassalluni.
- Båndit digitalisererneqareerpata taava aallakaatitassiat pissanganartut amerlasuut tamanut ammaanneqassapput, ilaqutariit ileqquinut tunngassuteqartut, piniariartarfinnut, kalaallisuuliornernut aamma umimmaat qiviunik suliarinninnernik politikkikkut inuunermut, Kalaallit oqaasiisa ineriartornerannut aamma silaannaap pissusaata allanngoriartorneranut nunat ilaanut issittumi pingaarutilerujussuit.
KNR-ip naatsorsuutigaa immiussanik digitaliseriineq 2024-p naanerani naammassineqassasoq.