KNR-imut akulerunnissaq mianersoqqussutigaa
Demokratiimik saassussineruvoq KNR pinngitsaaliniaraanni oqaaseqartarfiit ammaqqinnissaannik, Demokraatit isumaqarput.
Atassut mianersuaalliorpoq partii sioorasaarimmat politikkikkut pissaaneq atorlugu KNR-p oqallittarfia ammaqqinniarlugu.
– Aaqqissuisoqarnikkut kiffaanngissuseqarnermut politikkikkut akulerunnissaq ataasiaannarlutaluunniit akuerigutsigu tamanna peqatigalugu akuerissavarput tusagassiorfiit kiffaanngissuseqarunnaartut. Tamannalu demokratiimik sakkortuumik saassussineruvoq, Andreas Uldum oqarpoq.
Taamatut oqarpoq Demokraatit tusagassiornermut politikkikkut oqaseqartartua, Atassutip sullissinissamik isumaqatigiissut atorlugu tusagassiorfik tamanik sullissisoq pinngitsaaliniarmagu oqaaseqartarfiit ammaqqeqqullugit.
ALLASERISAQ ATUARUK: Atassutip KNR-p oqallittarfia ammaqqinniarpaa
Andreas Uldumip Atassutip politikkikkut siulittaasuata tullia assigalugu uggornartoqartippaa KNR-imi oqallittarfiup matunera. Tamannali partiip akuleruffigiumanngilaa.
Tassami tamanna demokratiip tunngaviisa ilaannik saassunnerussaaq - tassalu killilersugaanngitsumik attuumassuteqanngitsumillu tusagassiorsinnaanermut, Uldum oqarpoq.
– Demokratiimik saassussineruvoq, paasiuminaapporlu partii - taaneqartoq - partiitut nutaaliortutut imminut piumaffigisinnaammat aaqqissuisoqarnikkut kiffaanngissuseqarnermut akulerunnissaq. Atassut ilisimasaqarnerusariaqarpoq partiilu kajumissaarusupparput siunissami tusagassiorfiit kiffaanngissuseqartumik tusagassiornikkut pingaarnersiuisarnerat ataqqeqqullugu, Andreas Uldum oqarpoq.
ALLAASERISAQ ATUARUK: KNR: Tulleriissaarineq pineqarpoq