KNR-ip misissuisitsisimanera ilisimatusartuni arlalinnit isornartorsiorneqartoq
Isumasiuinerit sumik tunngaveqarnersut ersarinnerusariaqarput. Tusagassiorfiillu isumasiuinernik atuisussaatillutik annertuumik akisussaaffeqartarput, ilisimatusartut isumaqarput.
- Najaaqqap isornartorsiuinera ilalerpara. Misissuineq qanoq ingerlanneqarsimanersoq pillugu ersarinnerusumik nassuiaateqannginnera assorsuaq isornarpoq, Inuiaqatigiilerinermi, Aningaasaqarnermi Tusagassiutilerinermilu Institutimeersoq Rasmus Leander Nielsen Sermitsiaq.AG-mut oqarpoq.
Ilisimatusartut allat assigalugit nalunaareersimasut kisiisa atorlugit isumasiuinerit inuiaqatigiit siammasissumik tunngaveqartut atorlugit misissuisitsinernut assersuunneqarsinnaanngitsut.
- Periuseq atorneqartoq akissutigineqartunik tunngavitsigut equngassuseqarsinnaaneranik pilersitsisinnaavoq, qanorlu siammasitsingisumik tunngaveqarneranik aamma tikkuussisinnaanani, Rasmus Leander Nielsen oqarpoq.
- KNR-imit paasititsineq naammanngilluinnarpoq. Paasissutissaatai tunngavigalugit takusinnaanngilarput paasissutissat atugaat sunit tunngaveqarnersut. Inuiaqatigiinni eqimattat assigiinngitsut akissuteqarsimanersut aamma takusinnaanngilarput, soorlu suiaassuseq, ukiut suminngaanneernerat assigisaallu.
Tusagassiorfiit akisussaaffeqarput
Inuiaqatigiilerinermi, Aningaasaqarnermi Tusagassiutilerinermilu Institutimi adjunkt aamma ph.d-nngorniaq, Signe Ravn-Højgaard, oqarpoq tusagassiornermik suliaqarnermi misissuinerit suut atorneqarnersut pillugit tusagassiorfiit immikkuullarilluinnartumik akisussaaffeqartut.
- Tusagassiorfiit paasissutissat eqqortut saqqummiuttussaavaat imaluunniit paasissutissat atukkatik qulakkeerniarlugit misissorsimalluartariaqarlugit. Tusagassiuinermi ileqqoreqqusani tamanna allassimavoq, inuiaqatigiit tusagassiorfinnik tatiginnissinnaanerput qulakkeerneqarsinnaaniassammat. Taamaammat tusagassiorfiit isumasiuinernik saqqummiussinissamut aamma mianersortariaqarput, isumasiuinerit qularnaatsuujuaannanngimmata. Saqqummiussinermili atuartunut, tusarnaartunut isiginnaartunulluunniit erseqqissumik nassuiaammik ilanngussisoqartariaqarpoq.
Taanna isumaqarpoq KNR-ip misissuititsisimanera paasissutissatigut amigaateqartoq.
- KNR-ip isumasiuisitsinera kisitsisitigut qularnartoqarpoq. Oqaatigiuminaappormi IA imaluunniit Demokraatit taaneqarnerussanersut. Misissuisitsinermi qularnartoqarnera atuartunut isiginnaartunullu erseqqissarneqarnissaa pingaaruteqarpoq.
Nunatsinni ilisimatusarnerit ikippallaartut
Rasmus Leander Nielsenip tikkuarpaa nunatsinni isumasiuinerit qanoq sunniuteqartarnersut ilisimatusartoqartarsimanngitsoq, isumasiuinerit amerlagisassaasanngimmata. Taanna nassuiaavoq nunani allani isumasiuinerit aallaavigalugit innuttaasut qinersisinnaasarnerat takuneqarsinnaasareertoq.
- Assersuutigalugu partii aalajangersimasoq isinngitsooratarsinnaasoq misissuisitsinerup takutippagu, qinersisartoq sunniuteqaqataarusunnini pillugu partiimik allamik qinersisinnaasarpoq.
- Aamma qinerusutap isersinnaanera qularnarpat amerlanerusut qinersiartoriataarsinnaapput, imaluunniit isertikkusutaq misissiunermi taaneqarluarsimappat qinersiartunngitsoorneq pisinnaasarluni.
Kinguneqarsinnaasoq
Rasmus Leander Nielsenip oqaatigaa isumasiuinerit nunatsinni amerlassusaat unammillernareersoq.
- Nunatsinni qinersinernut tunngatillugu isumasiuinerit ajoraluartumik ikittuararsooreerput. Isumasiuineq ataasiinnaappat, taassuma pitsaassusaa apeqquserneqartariaqarpoq. Taamaattumillu qinersiartortut amerlassusissaanut sunniuteqaqataasinnaanersoq aamma nalilersorneqarluartariaqarluni.
- Isumasiuinermi inernerineqartoq uniuuttorujussuartut taaneqarsinnaassappat, qinersinermi allatorluinnaq kinguneqartitsisinnaavoq, oqarpoq.