KNR isumasiusimanerup isornartorsiorneqarnera pillugu: Nalunaarsimasut isumasiorneqarnerannik taasimassagaluarparput
KNR-ip nutaarsiassaqartitsiviani pisortaq Alice Sørensen oqarpoq isumasiuisimaneq pillugu paasissutissiineq pitsaanerusimassagaluartoq. KNR-immi isumasiuisitsisimanini pillugu allaaserisaa arlalinnit isornartorsiorneqarpoq.
- Tunngaviatigut isumaqarpoq allassimassagaluaripput nalunaarsimasuinnaat akornanni apersuilluni isumasiuineq ingerlanneqarsimasoq. KNR-imi nutaarsiassaqartitsivimmi pisortaq taama inerniliilluni Sermitsiaq.AG-mut akissuteqarpoq.
KNR Savalimmiuni suliffeqarfik Aperaa.gl nalunaarsimasut akornanni apeqquteqartarfik aqqutigalugu misissuisitsinini tunngavigalugu allaaserisaqarsimavoq.
Ilisimatuulli arlallit isumaqarput nalunaarsimasuinnaat atorlugit misissuisitsineq, qinersisartut isumaannik misissuisitsinertut atussallugu ajornakusoortoq.
- Aallaqqaataaniilli ersarissarluanngitsoorsimavarput nalunaarsimasut apeqquteqarfigineqartareersut kisiisa atorlugit misissuisitsineq Aperaa.gl aqqutigalugu ingerlanneqarsimasoq, Alice Sørensen oqarpoq.
Misissuisitsinertut suli taarusuppaa
Aperaa.gl-imut apeqqutinik akisartussanngorlutik nalunaarsimasut kisimik aperineqarsimanerannik allaaserisami ersarissaasoqarsimanngikkaluartoq, KNR-imi allaaserisami tallimanngornermi saqqummersumi suli nassuiaat allanngorneqarsimanngilaq. Allaaserisap qulequtaani isumasiuisoqarsimanera suli ersippoq.
Alice Sørensenip erseqqissarpaa allaaserisami qassit akisimanersut, kisitsisillu naatsorsorneqarnerani qularnaat qanoq annertutiginersoq ersarissumik allanneqarsimasut. Atuartup nammineerluni atuarnermini akunnattoqarsinnaanera naliliiffigissavaa.
- Oqartoqarsinnaagaluarpoq kisitsisitigut nikingasoqarnissaanut qularnaat annertuallaartoq tusagassiutitigut suliaqarnermi atussallugu, uagulli nalilerparput atorsinnaasoq.
Ilisimatusartoq Najaaraq Demant-Poort oqarpoq akisimasut ikippallaartut misissuisimanerup qularnaatsumik atorneqarnissaanut. Nutaarsiassaqartitsivimmi pisortap aamma nassuerutigaa akissuteqartut nalinginnaasumik amerlanerujussuusaraluartut.
- HS-analyse atorlugu misissuisitsinerni akisimasut 700-gaangata nunatsinni misissuisitsinerup atorsinnaassusaa pitsaasutut nalilertarparput.
Nalunaarsimasunik misissuisitsinerit siammasissutut taaneqarsinnaanngillat
Misissuinermi pineqartumi inuit 578-it akisimapput. Ilisimatusartoq Najaaraq Demant-Poort isumaqanngilaq innuttaasut assigiinngisitaartut siammasissumeersullu akisimanissaat naatsorsuutigineqarsinnaasoq, siornatigulli nalunaarsimasut kisimik akisimammata. Ilanngullugu tikkuarpaa akissuteqartuni 421-t kimik qinersissanerlutik qularunnaareersimasut, taamaattumillu 27 procentit suli aalajangersimanatik akissuteqarsimasut.
KNR-ip misissuititsinerit qanoq pitsaatigitillugit atornissaanut aalajangertarnersoq pillugu apeqqummut, nutaarsiassaqartitsivimmi pisortap pisortaanerup akinissaa innersuussutigaa.
Nutaarsiassaqartitsivimmi pisortaq isumaqarpoq kisitsisitigut qularnartoqarsinnaagaluartoq, akissuteqartullu ukiutigut najugarlu eqqarsaatigalugu siammasissutut taaneqarsinnaanngikkaluartut, akissuteqartut aallaavigalugit nutaarsiassaliortoqarsinnaasoq.
- Atuartartut oqaluttuuppagut qanoq iliortoqarsimanersoq, taamaattumik aap ajunngilaq. Aperissaguillu pitsaanerusumik iliorsimasinnaagaluarnersugut, aap pitsaanerusumik iliorsimasinnaagaluarpugut. Sunaluunniit pitsaanerusumik suliarineqarsinnaavoq, maannali paasissutissat pisagut nalilersuinerpullu aallaavigalugit nutaarsiassiivugut, qinersinerup inernerisinnaasaa pillugu apeqqummut tunngatillugu, Alice Sørensen oqarpoq.