KNR teknikkikkut ajornartorsiuteqartoq
Pisortat tusagaassiuutitigut sullissiviat Facebookini aqqutigalugu nalunaaruteqarpoq attaveqaqatigiinnikkut atortorissaarutit akornuteqartut.
KNR Facebookimini allappoq, "KNR-ip qarasaasiatigut attavii tamarmik ajutooqqapput".
- Avataaniit suleqatigut suleqatigalugit aaqinniarsarivarput, KNR nalunaaruteqarpoq.
Ilanngullugu ilisimatitsissutigineqarpoq radiomi toqqaannartumik, ilanngutassiaqanngitsumik aallakaatitsineq ingersoq, TV attavinikkallarsimasoq nittartagarlu iserfigineqarsinnaasoq, taamaattorli telefonikkut attaveqartoqarsinnaanngikkallartoq.
- Radio toqqaannartumik FM-ikkut aallakaatitsivoq, ilanngutassialli ingerlanngillat
- TV KNR1 DVB-t-kkut aallakaatitsivoq. KNR2 ingerlanngilaq
- Web: Nittartagaq pisarnittut ingerlavoq
- Radio livestream ingerlanngilaq
- TV livestream: KNR1 ingerlavoq, KNR2 ingerlanngilaq
- On-demand tamarmik ajoquteqanngillat
- Oqarasuaatikkut attvigineqarsinnaangikkallarpugut
Mailisiat sianernerillu tiguneqarsinnaanngillat
Tallimanngornermi ualikkut KNR-ip Facebookimini erseqqissaavoq, atortorissaarutitigut ajornartoorneq sapaatip akunnerata naanerani aallakaatitassianut sunniuteqassasoq, taamatuttaaq tallimanngornermi Qanorooq aallakaatinneqarsinnaanngitsoq:
- Ajornartorsiut qaangerniarlugu sulissutiginnittoqarpoq. Aallakaatitassiat upalungaarsimanermut kanalerput atorlugu ingerlapput. Taamaammat aallakaatitat kipisarsinnaapput, taamatuttaaq sianerfigitikkaangatta mailerfigitikkaangattalu taakku tigusinnaanngilagut, tassani ilaallutik pilluaqqussutit nalunaarutillu.
- Atortorissaarutit ajoquteqarneri pissutaallutik Qanorooq tallimanngornermi aallakaatinneqassanngilaq, taamatuttaaq sapaatiuppat naalagiarneq toqqaannartumik aallakaatinneqassanngilaq, KNR killuffimmik nutarterinermini erseqqissaavoq.