Kofod: Kalaallit Nunaat pineqartillugu Kalaallit Nunaat avaqqutiinnarneqartassanngilaq

Folketingimut qineqqusaarneq taamaatingajalerpoq, Danmarkimili Socialdemokraatit qinersisoqareernerani pissaanermik tigummiaqaannarnissartik tamaviaarutigalugu.

Socialdemokraatit qinersisartut 25 procentiinit taaguunneqassangatinneqarnermikkut partiini anginersaalersinnaavoq, naalakkersuisussanilli pilersitsiniarnermut partiit allat apeqqutaasinnaallutik.

Maanna nunanut allanut tunngasutigut ministeriusup Jeppe Kofodip oqaatigaa, partiip Kalaallit Nunaannut tunngatillugu politikkia eqqarsaatigalugu, partii naalakkersuisuutitaqartutut ingerlaannassappat, Kunngeqarfimmi nunat pingasut suleqatigiinnerat nukittorsarneqassasoq.

Pingaartumik nunanut allanut tunngasutigut sillimaniarnermullu politikki pineqartillugu:

Suleqatigiinneq annertusarniaraa

- Nunanut allanut tunngasutigut sillimaniarnermullu politikkimi Kalaallit Nunaannut tunngassurteqartunik Kalaallit Nunaat peqataatinnagu oqaaluserinnittoqartassanngilaq, taamatuttaarlu Savalimmiunut tunngassuteqartut pineqartillugit aamma Savalimmiut peqataatinnagu oqaluuserineqartassanatik. Tamanna erseqqissumik oqaatigisinnaavara, Jeppe Kofod tallimanngornermi tusagassiortunik katersortitsinermi oqarpoq, nangillunilu:

- Socialdemokraatit naalakkersuisuutitaqaannassappata, Kunngeqarfimmi nunat immikkoortuisa akornanni ataqqeqatigiittumik peqataatitsisumillu aamma naligiimmik suleqatigiinneq annertusassavarput.

Nunanut allanut tunngasutigut ministerip aamma oqaatigaa, USA-mi nunanut allanut tunngasutigut ministeri Danmarkimut tikeraarmat Kalaallit Nunaannit Savalimmiunillu sinniisuutitat peqataasimasut, tikeraarneranilu Issittumut Atlantikulluunniit Avannaanut tunngassuteqartut oqaluuserineqarsimasut .

Tusagassiortunik katersortitsisoqarmat Sermitsiaq.AG-mit apeqqutigineqarpoq, Kalaallit Nunaanni politikkerit akornanni namminersulivittoqarnissaanik kissaateqartut amerlanerussuteqartillugit, Kunngeqarfimmi suleqatigiinnermut Socialdemokraatit politikkiat qanoq innersoq.

Kalaallit Nunaannit nammineq aalajangerneqartussaasoq

Jeppe Kofodip tassunga atatillugu erseqqissaassutigaa, tamatumannga aalajangiinissaq Kalaallit Nunaannit akisussaaffigineqartoq:

- Kalaallit Nunaanni innuttaasut siunissami namminiilivissinnaaneq namminiilivissinnaannginnerluunniit eqqarsaatigalugit qanoq iliuuseqarnissartik namminneq aalajangersinnaavaat. Namminersorneq pillugu Inatsit naapertorlugu tamanna namminneq aalajagingassarivaat.

- Uagut nunat tamalaat sunniiveqatigiittarnerat aamma sillimaniarnermi politikkikkut ullumikkut unammilligassatut isigisavut pillugit Danmarkimi naalakkersuisut Naalakkersuisullu qanimut suleqatigalugit suliaqarsimavugut, Jeppe Kofod oqarpoq.

Ataatsimiititaliaq nutaaq saqqummiukkaa

Politikkerip aamma erseqqissaassutigaa, qinigaaffimmi matumani attaveqartarnermut ataatsimiititaliamik pilersitsisoqarsimasoq, tassanilu illersornissamut, sillimaniarnermut nunanullu allanut tunngassuteqartunut.

- Ukiumut ataasiarluta ataatsimeeqatigiittarpugut, pineqartut taakku oqaluuserisarlugit aamma nunatsinnut pingasuusunut suut ulorianartorsiortitsisinnaanersut misissorniarlugu, Jeppe Kofod oqarpoq.

Sermitsiaq.AG-mit Jeppe Kofod amerlanerusunik apeqquteqarfigerusunneqarsimagaluarpoq, sapaatip-akunnerinilu arlalinni Socialdemokraatit Kalaallit Nunaannut politikkiat pillugu Socialdemokraatineersumik apersuernissamik qinnuteqartoqartaraluarluni. Tamannali iluatsinneqanngilaq.