Kollegiat pillugit apeqqut
Demokraatit paaserusuppaat kollegiani pissutsit ajortut naalakkersuisut qanoq iliuuseqarfiginiarneraat.
Inatsisartuni ilaasortap Lene Knüppelip (Demokraatit) apeqqutaanut tunngaviupput Aasianni GU-rtut inaasa ajussusiat pillugu Sermitsiami allaaserineqarsimasut.
Knüppelip erseqqissarpaa nammineq takusani tunngavigalugit paasisimallugu nunatsinni ilinniartut inaasa ilaat ajorluinnartuusut, »allaammi oqarsinnaavunga tamakkua najugaqarfigissallugit naleqqutinngitsuusut: Soorunalimi inuusuttut allatut ajornartumik taamaattunik najugaqartitaanertik annertuumik ajornartorsiutigaat, tamanna naapertuilluarnerunngilaq akuersaarneqarsinnaananiluunniit«, Lene Knüppel allappoq.
Lene Knüppelip paaserusuppaa naalakkersuisut decembarimi 2005-imi naalakkersuisunngoramilli kollegiat tungaasigut qanoq iliuuseqarsimanersut, massakkullu pissutsit iluarsiniarlugit qanoq pilersaaruteqarnersut.