Kommune Kujalleq: Nanortalimmi nunaqarfittaanilu innuttaasut avissaarnissamik piumasaqarput
Nanortalimmi nunaqarfittaanilu innuttaasut Kommune Kujallermit sumiginnagaasutut misigisimapput. Tamanna tunngavigalugu avissaarnissaq anguniarlugu atsiortitsinernik katersisoqarpoq.
Kommunit kattussuutsinneqarsimanerat pillugu naammaginninnginneq puttallaqqippoq. Tamatumuuna nunatta isuata nalaanit annikigisassaanngitsumik naammaginninnginneq ersersinneqarpoq.
Kommunit kattussuutsinneqarnerisa kingornali allannguisoqarnissaanik kissaateqarneq puttallartuartarpoq, taamaammallu immini nutaarsiassaanngilaq. Aaqqissuussaaneq iluarsartuuteqqinneqarmalli 1. januar 2009-mi kommunit kattussuunneqarnerannik kinguneqartumik, kommunalpolitikerit innuttaasullu ataatsimoorlutik ersersitsiuartarput qanimut oqartussaaqataaneq innarlerneqarsimasoq.
Qanimullu oqartussaaqataanerup innarlerneqarsimanera pissutaarpiarluni nunatsinni kommunit isorartussutsimigut annerpaartarilersimasaraluannik avissaartitsinikuuvoq, taamaalilluni Avannaata Kommunia 1. januar 2018-mi kommuninut marlunnut avinneqarnikuuvoq, tamatumalu malitsigisaanik Qaasuitsup Kommunia aammalu Kommune Qeqertalik pinngornikuullutik.
Taamatuttaaq nunatsinni inoqarfiit avinngarusimanerpaasutut inissisimasut, tassalu Tasiilaq nunaqarfittaalu, Ittoqqortoormiit aammalu minnerunngitsumik Qaanaaq nunaqarfittaalu immikkut kommuninngortinneqaqqinnissaannik piumasaqaateqartoqartarnera ataasiaannarani saqqummertarpoq, tassalu qanimut oqartussaaqataanerup innarlerneqarsimanera aamma tassani innersuussutigineqartarluni.
Nanortalimmi innuttaasut suliniaqatigiiffittaarput
Maannali tassa aamma Nanortalimmi nunaqarfittaanilu, Aappilattumi, Narsarmijini, Tasiusami, Alluitsup Paani, Ammassivimmi aammalu kommuniusimasup killeqarfigisimasaasa iluani savaateqarfeqarfiit piumasaqalerput Nanortalik immikkut kommuninngorteqqinneqassasoq.
Suliniaqatigiiffik siunertamik suliaqartoq maanna atsiornernik katersileruttorpoq, taamaaliornikkut anguniarneqarluni Kommune Kujallermit avissaarnissaq.
Suliniaqatigiiffiup tungaanit erseqqissaatigineqarpoq Nanortalik nunaqarfittaalu nammineq kommunitut ingerlanissaminnut nukissaqarluartut. Ilaatigut innersuussutigineqarpoq aatsitassarsiornerup iluai suliniutit assigiinngitsut, inuussutissarsiutinik ingerlataqarneq uummaarissoq, ilaatigut takornariaqarnerup iluani inerisaasoqarluarnera, aalisakkanik suliffissuaq ingerlalluartoq aammalu minnerunngitsumik assassornerup iluani kiffartuussinermik suliaqarlutik namminersortut ingerlarsortut tunuliaqutaralugit Nanortalik kommunitut nammineq ingerlasinnaalluarneragaalluni.
Suliniaqatigiimmi taakku qulit missaannik siuttoqartut innuttaasut suleqataasut saniatigut inuussutissarsiutinit assigiinngitsuneersuupput, tassa aalisarnermik inuussutissarsiortut, takornarialerisut, aatsitassarsiornissamik suliniutini suleqataasut assassornikkullu kiffartuussinermi suliffeqarfiit peqatigiillutik qanimut oqartussaaqataaneq atuutilersinneqassasoq piumasarivaat. Nanortallillu illoqarfitata saniatigut aamma nunaqarfittai kommuninngoqqinnissamik anguniakkamut isumaqataalluinnarput:
- Nanortallip kommunerisimasaani illoqarfiup saniatigut aamma nunaqarfittatsinni innuttaasut atsioqataarusummata nunaqarfinnut atsiugassanik nassiussuivugut, malugisinnaavaralu Nanortallip illoqarfiatulli taakku aamma piareersimatigisut tamaviaaqataarusuttullu Nanortallip kommuninngortinneqaqqinnissaanut - Kommunerpummi uterteqqikkusupparput, suliniaqatigiiffimmik aallarneeqataasoq Minik Serano Frederiksen Sermitsiaq.AG-mut oqarpoq.
Ullup ataasiinnaap ingerlanerani atsiornerit 500-it sinnerlugit katersorneqarput
Avissaarnissamik suliniuteqartunut aallarneeqataasoq, Minik Serano Frederiksen Sermitsiaq.AG-mut oqaluttuarpoq, atsiornernik katersiliinnarlutik isumaqataasorpassuit atsiorumasimasut imaaginnavittut, atsiornernimmi katersineq aallartiinnartoq ullup ataatsip ingerlanerinnaani Nanortallip illoqarfiinnaani innuttaasut 500-it sinnerlugit amerlassusillit ingerlaannaq atsiorsimasut taanna oqaluttuarpoq:
- Piffissami sivisoorujussuarmi misigisimajuartarpugut pingaartumik Qaqortumut aningaasarsiutaannaalluta. Nanortalimmut nunaqarfittaanullu iluaqutaasussanik ineriartortitsisoqanngilaq, uffa illoqarfitsinni nunaqarfittatsinnilu aningaasarsiutaalluartunik inuussutissarsiutitigut ingerlarsoraluarluta, pingaartumik aalisarnerup takornariaqarnerullu tungaatigut. Aningaasarpassuilli isaatitagut Qaqortumi karsimut nakkartinneqartarput uagutsinnullu annertunerusumik iluaqutissiissutaassanatik, tamannalu akueriinnarsinnaajunnaarparput. Kommunerput uummaarissoq uterteqqikkusupparput, Minik Serano Frederiksen oqarpoq.
Atsiornerit Kommune Kujallermut tunniunneqassapput
Atsiornerpassuit katersorneqartut kommunalbestyrelsip ataatsimiinnissaani 14. februar 2024-mi ingerlanneqartussami borgmester Stine Egede (IA)-mut tunniunneqassasut suliniaqatigiit pilersaarutigaat. Minik Serano Frederiksen piumasaqaaertik tusaalluarneqassasoq isumalluarnerarpoq:
- Pilersaarutigaarput atsiornerit kommunalbestyrelsip 14. februar ataatsimiinnissaanut atatillugu tunniutissallutigit, ilisimavarpullu kommunip avinneqaqqinnissaa pillugu kommunalbestyrelsip oqaluuserisassaanut ilaatinneqassasoq. Tamatuma kingorna aamma pilersaarutigaarput Inatsisartut Naalakkersuisullu saaffigissallutigit qinnuigalugillu piumasaqaaterput pimoorussamik suliarissagaat.
- Tusaanngitsuusaaginnarsinnaanngilaatigut, pingaartumik innuttaasut taamak amerlatigaluta ersarissumik piumasarigatsigu kommunerisimasarput uterteqqinneqassasoq, taamaammat isumalluarpunga kissaaterput angusinnaassagipput, Minik Serano Frederiksen naggataatigut Sermitsiaq.AG-mut oqarpoq.
Sermitsiaq.AG-mit sulissutigaarput nunamut namminermut naalakkersuisoq, Jess Svane (S) matumani pineqartoq pillugu oqaaseqartissallugu.