Kommune Kujallermi innuttaasut akileraarnikinnerulissapput

Kommune Kujallermi innuttaasut 2024-mi akileraarnikinnerulissapput.

Kommune Kujallermi kommunalbestyrelsemi ilaasortat aningaasanut missingersuutit 2024-moortut siullermeerlugit ataatsimiissutigaat. Aningaasanut missingersuutit suliarineqarneranni amerlanerussuteqartut, tassa IA aamma Demokraatit, kommunimut akileraarutip 28 procentimiit 27 procentimut 2024-mi appartinneqarnissaa akuersissutigaat.

Tamanna 6-7 milliuunit koruuninik naleqartoq, Kommune Kujalleq tusagassiorfinnut nalunaaruteqarluni ilisimatitsivoq.

Kommune Kujalliup naatsorsuutai naapertorlugit akileraarutinit isertitat ukiuni kingullerni amerliartulersimapput. Akileraarutiniillu isertitat suli annertuneruleriartornissaat naatsorsuutigineqarpoq, mittarfiliortoqarnera aatsitassarsiortoqarneralu pissutigalugit.

Innuttaasunut iluaqutaassasoq

Tamassuma saniatigut Naalakkersuisut aalajangerput Kommune Kujalleq ingerlatsinermut sanaartornermullu aningaasanik atuisinnaaneranut missingersuussillutik. Tamannalu isumaqarpoq kommuni aningaasanik amerlanerusunik sinneqartuussasoq.

- 2024-imi Kommune Kujalliup missingersuutaanik Naalakkersuisut qanittukkut inissiinerat aqqutigalugu kommunip aningaasat atorsinnaasai qaffariaateqarput, kommuni allappoq.

Borgmester Stine Egede (IA) kommunalbestyrelsemut siunnersuuteqarpoq kommunimut akileraarut apparneqassasoq, aningaasat atorneqarsinnaasut amerlinerat innuttaasunut malugineqartussanngorlugu.

- Aningaasat atorneqarsinnaasut amerlinerisa akileraartartunut iluaqutissanngortinneqarnissaanik siunnersuuteqarpunga, kommunalbestyrelsimullu 2024-imi kommunimut akileraarummik appaanissamik siunnersuuteqarlunga. IA Demokraatillu isumaqatigiipput 2024-milu akileraarutip 28%-imiit 27%-mut appartinneqarnissaanik aalajangiillutik, Stine Egede oqarpoq.

Aningaasanik sukangasuumik aqutsineq suli ingerlanneqassaaq

Kommune Kujallermi innuttaasut 2024-miit katillugut 43 procentimik akileraartalissapput, tassa kommunimut aamma nunatta karsianut.

Kommune Kujalleq aningaasaqarnikkut ukiuni kingullerni ilungersuuteqarsimavoq. Aningaasallu sukannersumik aamma aqunneqarsimanerat, suli ingerlatiinnarneqassasoq borgmester Stine Egede erseqqissaavoq.

- Aningaasaqarnitsinnik sukangasuumik aqutsinerput ingerlateqqissavarput nuannaarpungalu kommunip inuinut inugilerumaagaanullu nalunaarutigisinnaagakku kommunimut akileraarut 2024-mi procentimik ataatsimik appartinniaripput, Stine Egede oqarpoq.

Kommunip 2024-mut aningaasanut missingersuutaat kommunalbestyrelsemi novemberimi aappassaaneerneqassapput.