Kommune Kujallermi isumaginninnermut pisortartaarpoq

Aningaasaqarnermut ataatsimiititaliami ilaasortat tamakkiisumik isumaqatigiillutik aalajangiuppaat Kista Isaksen isumaginninnermut pisortatut atorfinitsinneqassasoq.

Tamanna marlunngornermi pivoq, taannalu ullormut oqaluuserisassatuaasimalluni. Taanna qinnuteqartut tallimat akornanni toqqarneqarpoq.

Kista Isaksen, Qaqortumi inunngorlunilu peroriartortoq 44-nik ukioqarpoq niuernermik ilinniarfimmi EVU-mi aningaasaqarnermut allaffissornermullu ilinniarsimalluni.

Kommune Kujallermi isumaginninnermut pisortanngornissami tungaanut 2008-miilli Niuernermik Ilinniarfimmi kingusinnerusukkut Campus Kujalliup ilagiligaani ilinniartitsisutut kingusinnerusukkullu pisortatut qaffassarluni 2014-miit ilinniartitaanermut pisortatut september 2016-mi Ilisimatusarfimmi ilinnialernissami tungaanut sulivoq.

- Assut nuannaarutigaarput isumalluarlutalu Kista Isaksen isumaginninnermut pisortatut atorfinitsinneqarmat, borgmesteri Kiista P. Isaksen (S) oqarpoq.

Kommuni Kujallermi isumaginnittoqarfik arlaleriarluni sammineqangaatsiartarsimavoq, ilaatigut Namminersorlutik Oqartussat nakkutilliisuisa nalunaarusiornerani sakkortuumik isornartorsiorneqarsimalluni.

Ajornartorsiutillu aaqqiivigissallugit qaammatini kingullerni kommuni sulissuteqarsimavoq.

- Kista aqutsinermik misilittagaqarluartuuvoq suliallu annertusinnaagaluartut tamakkiisumik isiginnissinnaassuseqarluartuuvoq
ataqatigiissaarillaqqissuullunilu, tamannalu isumaginnittoqarfimmi aaqqissuussaanikkut nutarteriffigineqaleruttortumi atorfissaqarteqaarput, borgmester Kiista P. Isaksen oqarpoq.

Kista Isaksen timersornerup iluani nunatsinni annertuumik aamma kivitseqataavoq, pingaartumik assammik arsarnerup tungaatigut, taamatuttaaq nammineq timersortuusimanermi saniatigut aamma timersoqatigiit kattuffianni siunnersortaasimavoq inuusuttorpassuillu timersornermik aallutaqartut tamanna iluaqutigilluagarivaat.

Kista Isaksen ingerlaannartumik atuutilertumik Kommune Kujallermi isumaginninnermut pisortatut sulilereerpoq.