Kommune Kujallermi meeqqat immikkut ittumik illersuiseqarsinnaalissapput
Inuit arlallit najortinngornissaminnut Qaqortumi maanna pikkorissaleruttorput
Kalaallit Meerartaat aamma Kommune Kujalliup suleqatigiinnermut isumaqatigiissut ukioq manna apriilip qaammataani atsiugaat tunngavigalugu pikkorissartinneqarput.
Peqatigiiffik Kalaallit Meerartaat tusagassiutinut nalunaarummi allappoq.
Suleqatigiinnermut isumaqatigiissut Kommuneq Kujallermi meeqqat isumaginninnikkut sullinneqartussanngornerminni najortimik illersorteqarsinnaasarnissaannut qulakkeerisuussaaq.
Allagartartaangajalersut
Qaqortumi, Narsami, Nanortalimmi Paamiunilu najortit meeqqat isumaat isumaginninnermi imminnut tunngasunik ingerlatsinermi tusaaneqartarnissaannut meeqqallu peqataatinneqartarnissaannut qulakkeerisartussanngornissaminnut Qaqortumi maanna pikkorissaleruttorpoq.
- Najortitut ikiuuttalertussanngungajalernerat ikiuimatussusertillu tunngavigalugu sunniuteqartalertussanngungajalernerat nunnaarutigisorujussuuarput, Nike Berthelsen tusagassiutinut nalunaarummi oqarpoq.
- Kommune Kujalleq isumaqatigiissuteqarfigigatsigulli Kommune Kujallermi meeqqanut illersuisinnaasunik atuuttussanik najortissarsiulerpugut. Najortinngortussat meeqqamik oqaloqateqarluarnermiit kommunini sulianik ingerlatseriaatsinut tunngasunik maanna pikkorissaleruttorlutillu pikkorissarsimanerminnut uppernarsaammik tunineqartussanngungajalerput, nangilluni oqarpoq.
Najorti kommunini tamani
Tamatuma saniatigut sulianik ingerlatsisut sulianik ingerlatsinerminni najortinik peqataasoqartalernissaanut piareersimanissaat qulakkeerumallugu katerisimaartinneqarput.
- Najortimik taallugu illersuisussaqartitsinermut aaqqissuussaaq taamatuttaaq najortimik peqataasoqartillugu sulianik ingerlatseriaaserineqarsinnaasut sulianik ingerlatsisartunit ilisimaneqassapput. Taamaattumik sulianik ingerlatsisartut Kommune Kujallermi illoqarfiit tamaneersut katerisimaartinnerisigut workshoppertippavut. Sulianik ingerlatsisartut paaserusutaminnut tunngasunik akissutisinissaat toqqissisimanissaallu taamatuttaaq najortimik peqataatitsinerup pitsaaqutaanik paasinninnissaat pingaaruteqarpoq, Nike Berthelsen oqarpoq.
Nuna tamakkerlugu
Taamatuttaaq Kalaallit Meerartaaneersut najortimik taallugu illersuisussaqartitsinermut aaqqissuussaq pillugu paasissutissanik siammarterinissartik siunertaralugu Narsami, Nanortalimmi Qaqortumi atuarfinnut paasissutissiiartorlutik pulaarput, ilisimatitsissutigineqarpoq.
Najortitut pikkorissartut Kommune Kujallermi meeqqanut illersuisutut ukiaru 2019-imi atuuffeqarsinnaanngussangatinneqarput.
Kommunit tamarmik meeqqat najorteqalernissaat sulissutigineqarpoq.