Kommune Qeqertalik: Kommunaldirektøri tunuarpoq

Kommune Qeqertalimmi kommunaldirektøri aalajangerpoq tunuassalluni kingusinnerpaamillu oktoberip naanerani naggataamik sulissalluni. Kommunimi borgmester Ane Hansen naatsumik nalunaaruteqarluni taama allappoq.

Hans Peter kommunip januaarip aallaqqaataani 2018-imi atuutilerneranit atorfeqalerpoq, kommunillu pilersikkiartuaarneranut kommunip nutaamik aaqqissugaaneranik suliaqartuulluni.

- Kommunip nutaajusup Kommune Qeqertaliup aallartitsarnerani, aaqqissuusseriaatsimik nutaamik sinaaakusersuisimasumik pitsaasumik kommunaldirektøreqarsimanera nuannaarutigeqaarput,
ilisimavarpullu taartissaanik nassaarniarnissaq ajornakusoortussaasoq. Illuatungaatigulli aamma Hans Piitap aalajangernera ataqqiniarparput qularinnginnatsigu aalajangerneq eqqarsaatigilluaqqaarlugu pisimasoq, Kommune Qeqertalimmi borgmester Ane Hansen tusagassiutinut nalunaaruteqarluni oqaaseqarpoq.

Kommune Qeqertalik ilisimatitsivoq Hans Peter Poulsenip suliani piffissami qaninnermi agguataassagai.