Kommuneqarfik Sermersooq: IA-p pissaanera qumarpoq
Kommunalbestyrelsimi ilaasortaq Mia Skifte Lynge (IA) kommunalbestyrelsemit ilaasortaajunnaarnissaminik qinnuteqaateqarpoq. Taamaalilluni Storm Ludvigsen inissaqalerpoq, taannali Inuit Ataqatigiinniit tunuarnikuuvoq. Tamanna isumaqarpoq IA Nalerarlu qulinik qinigaatitaqalissasut illuatungiliuttullu qulingiluanik qinigaatitaqalissallutik.
Kommuneqarfik Sermersooq, innuttaqassutsimigut aningaasaqarnikkullu nunatsinni kommunini pissaaneqarnerpaatut inissisimavoq. Ukiulli kingullit arlallit kommunemi tassani eqqissiviilliornerit assigiinngitsut arlallit ilisimaneqarput.
Inuit Ataqatigiit, pissaaneqarnerpaatut inissisimasoq, augusti naalerpat, kommunalbestyrelsi ileqquusumik ataatsimiilerpat pissaaneqassutsimigut qumartussanngorpoq, amerlanerussuteqaqqalaartut tunuliaqutigisussanngoramigit.
Tamanna pissaaq Inuit Ataqatigiit qinigaatitaminnik ataatsimik annaasaqartussanngormata, taamaalillutillu qinigaatitai qulingiluaniit arfineq pingasunut ikileriartussanngormata.
Naleraq marlunnik qinigaatitaqartoq peqatigalugu, Sermersuumi politikkikkut suleqatigiit nangissinnaaqqarput 10-9-mik inissisimanermikkut, taamaalilluni aamma suleqatigiit qinigaatitamikkut ikileriaateqartussaassallutik. Tassa suleqatigiit taakku akornanni avissaartoqassagaluarpat 6. april 2025, ulloq kingusinnerpaamik kommunalbestyrelsimut qinersiffissaq sioqqullugu, IA pissaaneeerutissaaq, partii taanna allanik partiinik suleqatigisinnaasaminik nassaanngitsuussappat.
Sermitsiaq.AG-mit paasisagut naapertorlugit Mia Skifte Lynge (IA) kommunalbestyrelsemi ilaasortatut tunuarniummik tunniussisimavoq. Tamanna isumaqarpoq sinniisussaq siulleq Storm Ludvigsen ilaasortanngussasoq.
Kommunalbestyrelsimut ilaasortanngornissaminut akuersereerpoq
Storm Ludvigsen Sermitsiaq.AG-mut uppernarsaavoq Kommuneqarfik Sermersuumit attavigineqarsimalluni, tassani aperineqarluni kommunalbestyrelsimut isernissaminut piareersimanersoq:
- Aap, uppernarsarsinnaavara aperineqareerama, aamma aap, akuersivunga piareersimallunga kommunalbestyrelsimut isernissannut, tamannalu assut qilanaarivara, Storm Ludvigsen Sermitsiaq.AG-mut oqarpoq.
Attaviitsooqqaarallassaaq
Storm Ludvigsen oqaluttuarpoq Inuit Ataqatigiinnut uternissaminik pilersaaruteqarani, taamaammallu kommunalbestyrelsimi suleqatissaminik tipisiueqqaarallassalluni:
- Nalunngilara kisimiillunga suliniutima iluatsinnissaat artorsaatigisinnaassallugu nukippassuarnillu atuisariaqarsinnaassallunga, tassa kisimiillunga suleqateqarnangalu inississagaluaruma, taamaammat siullermik kommunalbestyrelsimut iseqqaarallassaanga tamatumalu kingorna suleqatissarsiussaanga, tassanngaaniillu sunniuteqarsinnaanera annerpaatinniarumaarpara, Ludvigsen Sermitsiaq.AG-mut oqarpoq.