Kommuni inooriaatsip pitsaassusaanik qaffaaniartoq
Avannaata Kommunia illoqarfinni nunaqarfinnilu imermut eqqaavinnullu atassutqarneq pitsanngorsaaffiginiarlugu pilersaarusiornissamut piareeqqavoq.
Eqqaaveqarnermi pissutsit pitsanngorsarniarlugit, angerlarsimaffimmi aamma suliffeqarfinni, Naalakkersuisut suleqatigalugit Issittumi perusuersartarfimmik ineriartortitsinissamut Avannaata Kommuni peqataaniarpoq.
Tamanna kommunip pilersaarutitut periusissiaani nutaami tusarniaassutigalugu nassiunneqarsimasumi atuarneqarsinnaavoq.
- Perusuersartarfeqarnermi aaqqiissutit nutaat nassaariniarpagut, soorlu assersuutigalugu perusuersartarfiit ikuallanneqarsinnaasut aamma perusuersartarfiit allat attanneqarsinnaasut, tusarniaassutigineqartumi ilaatigut allassimavoq.
Piffissamut ungasissumut pilersaarusiorneq
Kommuni imermik pilersuinermik pitsanngorsaanissaq eqqaaveqarnikkullu pitsaasumik atugaqarnissamik pilersitsinissaq eqqarsaatigalugit piffissamut ungasissumut pilersaarusiortariaqarpoq. Tassungalu atatillugu Nukissiorfii suleqatigineqarnissaat pisariaqartinneqarpoq, tusarniaassutigineqartumi ilisimatitsissutigineqarpoq.
Nunaqarfinnimi inissiani ataasiakkaani ukioq kaajallallugu toqqaannartumik imermik pilersuisoqanngilaq. Innuttaasut, ikittunnguit kisimik pinnatik, imertartarfinni imertartarput, taakkunani aasaanerani imermik kuutsitsivimmit slangitigut imeq inissianut ataasiakkaanut ingerlasarpoq.
Imeq
- Naalakkersuisut suleqatigalugit imeq imigassaq naammattoq qaffasissumik pitsaassusilik aamma imermik maqitsisarfiit naammattut pilersinniarpagut, taamaasillutik innuttaasut imermik ajornanngitsumik pissarsiniassammata. Aammattaaq Naalakkersuisut suleqatigalugit immap erngata salittarnissaa misissorniarparput, piffinni imeqarpianngitsuni, tusarniaassutigineqartumi erseqqissaassutigineqarpoq.
Kommunip pilersaarutitut periusissiaa pingasunngornermi novembarip sisamaaniit decembarip 16-iata tungaanut tusarniaassutigineqassaaq.