Kommunimi amerlanerussuteqartut inissianut akiliut 2 procentimik qaffannissaa akueraat

Avannaata Kommuniani INI A/S-ip ataani inissiaateqarfiit immikkoortortai pingasut aningaasanut missingersuut 2023 naammassiniarunikku ingerlatsinermut taperneqarnissamik pisariaqartitsipput.

Kommunimilu illoqarfiup ineriartortinnissaanik suliaqartoq ingerlatsivik Avannaa Developments inissiaatiminik aserfallatsaaliinissamut isumatusaartumik ileqqaarisinnaaniaruni, aamma inissiaatimi akiinik qaffaanissamik pisariaqartitsivoq. Illoqarfiup ineriartortinnissaanik suliaqartut inissiaataasa immikkoortortaani ataatsimi inissiat qaammammut akiisa 2 procentimik, inissiaateqarfimmilu immikkoortortaqarfimmi allami inissiat qaammammut akii 3,7 procentimik akitsorneqarnissaat kissaatigaa.

Siunnersuutit immikkoortut marluk ataatsimoorullugit kommunalbestyrelsep 7. oktober ataatsimiinnerminni oqaluuseraat.

Amerlanerussuteqartut, tassa IA, Atassut, Naleraq aamma Demokraatit kiisalu borgmester Palle Jeremiassen inissiat INI A/S-imit ingerlanneqartut aamma Avannaa Developmentsip aqunneqartut qaammammut akiisa 2 procentimik qaffaavigineqarnissaat akuersissutigaat.

Kommunalbestyrelsemi ikinnerussuteqartut, tassa Siumut aamma attaviitsoq Minik Høegh-Dam akinik qaffaanissamut akuersinngillat.

Inissiat akii qaffallugit tapiissuteqarlunilu

Inissianik attartortakkanik ingerlatsinermik suliaqartoq INI A/S kommunimut tapiissutinik noqqaassuteqarsimavoq periarfiassanillu pingasunik siunnersuuteqarsimalluni. Uummannami, Upernavimmi Qaanaamilu inissiat ingerlanneqarnerinut tapiissuteqartoqarnissaa pisariaqartinneqarpoq.

Periarfissat uku INI A/S-imit saqqummiunneqarput:

• Kommuni tamakkiisumik 1.535.574 koruuninik ingerlatsinermut tapiissuteqassaaq, inissiallu akii nikisinneqaratik.
• Kommuni 1.252.158 koruuninik ingerlatsinermut tapiissuteqassaaq, inissiallu akii 2 procentimik qaffanneqassallutik.
• Kommuni 827.034 koruuninik tapiissuteqassaaq, inissiallu akii 5 procentimik qaffaavigineqarlutik.

Kommunimi amerlanerussuteqartut siunnersuut nr. 2 akuersissutigaat. Tassa kommuni INI A/S-ip ingerlatsineranut 1.252.158 koruuninik tapiissuteqassasoq, inissiallu qaammammut akii 2 procentimik qaffanneqassallutik.

Qeqqani naaperiarneq

Avannaa Development ingerlatsinermut aningaasartuutinik nalimmassaanissamut aamma piumasaqarpoq. Siunnersuummi siullermi inissiat 2 procentimik qaffaasoqarnissaa amerlanerussuteqartut akuersissutigaat, inissialli immikkoortortaqarfimmi allamiittut akii 3,7 procentimik qaffanneqarnissaat akuerisinnaanagu. Nikingassut illoqarfiup ineriartortinnissaanut ingerlatseqatigiiffiup nammineq aningaasanik uninngasuutaanit matussuserneqarsinnaasoq aalajangerneqarpoq.

Kommunalbestyrelsemi ikinnerussuteqartut, tassa Siumut aamma attaviitsoq Minik Høegh-Dam INI A/S-imi aamma Avannaata Developmentsimi inissiat akiinik qaffaanissaq akuerinngilaat. Ikinnerussuteqartut ima oqariartuuteqarput:

- Kommunip attartortangaataani inissiaateqarfiup immikkoortortaani pingasuusuni, ingerlatsinikkut pisariaqartitaannik qinnuteqaateqartut tunngaviatigut paasivarput. Ukioq manna malunnartumik illoqarfinni nunaqarfittaanilu taakkunani coronap kinguneranik taamatullu sorsuttoqarneratigut nioqqutissat annertuumik akitsupiloornerat innuttaasut malugivaat, Siumut Minik Høegh-Damilu allapput nangillutillu:

- Taamaattumik tamakkua innuttaasut atugaat eqqarsaatigalugit Siumumiit Minik (Høegh-Dam, aaqq.) peqatigalugu inassuteqaat siulleq ineqarnermut akiliut allanngornani qinnuteqaat 1.535.574 kr. tapiissutissatut taanna iluanaarutissaniit ilanngaavigineqarnissaa inassutigaarput, ikinnerussuteqartut allapput.

Ikinnerussuteqartut aamma Avannaata Developmentsimi inissiat akitsornissaat akuerinngilaat.