Kommunini marlunni nalunaarutiginninnerit amerlisut
Kalaallit qallunaallu akornanni nunatsinni meeqqat atugarliortunut suliniutinik suleqatigiissuteqarneq pillugu nalunaarusiami kommunit marluk nalunaarutinik amerlanerusunik pisimaneri allaatigineqarpoq. Avannaa aamma Kujalleq ukiut siuliinit nalunaarutinik amerlanerusunik pisimapput.
![Kommunini marlunni nalunaarutiginninnerit amerlisut](https://image.sermitsiaq.ag/104392.webp?imageId=104392&width=960&height=538&format=jpg)
Kalaallit Nunaanni meeqqat atugarliortunut suliniutit nukittorsarneqarnissaannut kalaallit qallunaallu suleqatigiissutaat pillugu suliat killiffiinik nalunaarusiornermi atuarneqarsinnaavoq kommunini marlunni meeqqat 0-17-inik ukiullit pillugit nalunaarutit tiguneqartartut amerleriarsimasut.
Kommun Kujallermi aamma Avannaata Kommuniani nalunaarutit tiguneqartartut ukiut siuliinut sanilliullugit amerleriarput. Kujalleq 1.504-nik meerartaqarpoq, Avannaata Kommunialu 1.225-nik meeraqarluni.
- Kommune Kujalleq 2021-mi ukiup kuartiini pingasuni siullerni meeqqat 0-17-t akornanni ukiullit pillugit katillugit 582-nik nalunaarutinik tigusaqarpoq. Nalunaarutit tiguneqartut 30. september tungaannaanooraluartut, taamaattoq takuneqarsinnaalereerpoq 2019 aamma 2020-mut sanilliullugit tiguneqartut amerlanerusut, nalunaarusiami allassimavoq.
Kommuni 2020-mi nalunaarutinik 399-inik tigusaqarpoq, 2019-imilu 343-nik tigusaqarsimalluni. Nalunaarusiami ilisimatitsissutigineqarpoq meeraq ataaseq arlaleriarluni nalunaarutigineqarsimasinnaasartoq.
Avannaata Kommuniani taamatorluinnaq ineriartortoqarpoq.
- Kisitsisit takutippaat 2021-mi ukiup kuartiini pingasuni siullerni nalunaarutit katillugit 338-it tiguneqarsimasut. Nalunaarutit tiguneqartut naatsorsorneqartut 30. septemberip tungaanooraluartut, taamaattoq nalunaarutit 2019-imut aamma 2020-mut sanilliullugit amerlanerulersimapput.
2020-mi 313-it tiguneqarsimapput, 2019-imilu 341-it tiguneqarsimallutik.
Kommunit allat amerlaqatigiiginnartunik tigusaqarput
Suliap killiffii pillugit nalunaarusiami, meeqqat, inuusuttut ilaqutariillu naalakkersuisoqarfiup, nunatsinni isumaginnittoqarfik pillugu aqutsisoqarfimmit aamma danskit isumaginnittoqarfik pillugu aqutsisoqarfiata suliaani nalunaarutiginninnerit allattorneqarsimapput. Suliap killiffii pillugit nalunaarusiaq 2020-mi ukiakkut suliaavoq Folketingimilu kalaallit nunaat pillugu ataatsimiititaliamut saqqummiunneqaqqammerluni.
Kommunit tallimaasuni sisamanut nalunaarutiginninnerit allattorneqarsimapput. Suliallu uninngaannartut aamma allattorneqarsimallutik. Kommune Qeqertalimmut nalunaarutiginninnerit ilaatinneqanngillat, kommunilli meeqqanut tunngatillugu suliassat 428-it 2021-mi allattorsimasuutigai. Taakkunannga 243 isumaginninnikkut sulinermi naliliisoqarnissaa pisariaqartutut nalunaarsorneqarsimallutik.
Kommuneqarfik Sermersooq aamma Qeqqata Kommunia 2019-imi aamma 2020-mi nalunaarutiginninnerit assigalugit 2021-mi ukiup kuartiini pingasuni siullerni amerlaqatipajaanik nalunaarutiginninnernik tigusaqarsimavoq. Kommuneqarfik Sermersooq 5.668-inik meeraqarpoq, 2021-milu 30. september ilanngullugu nalunaarutiginninnernik 1.892-inik tigusaqarsimalluni. 2020-mi 2.068-iupput.
Qeqqata Kommunia 2021-mi 30. september ilanngullugu nalunaarutiginninnernik 693-inik tigusaqarsimavoq. Kommunimi 2.383-inik meeraqarpoq.
Suleqatigiinnermi isumaginnittoqarfimmi suliassat ikilisarneqarnissaat anguniakkanut ilaavoq. Nalunaarutiginninnerillu amerlassusaat tunngavigalugu suliat uninngaannartut ikilisinnissaanut iliuusissanik suleqatigiit malinnaasinnaapput. Nalunaarusiaq naapertorlugu kisitsisit saqqummiunneqartut nikingasoqaratarsinnaapput, kommunimmi ataatsimoortumik nalunaarusiorfimmik ataatsimut naatsorsuiffiusinnaasumik atortorissaaruteqanngillat.