Kommuninut ataatsimut tapiissutit inissipput
Naalakkersuisut KANUKOKA-lu aappaagumut kommuninut ataatsimut tapiissutissanik isumaqatigiissut nutaaq tallimanngormat atsiorpaat.
Kommuninut 2009-mut ataatsimut tapiissutit 830,6 millioner koruuniussapput. Tassa imaappoq, aappaagumut ataatsimut tapiissutit ukioq mannamit 52,9 millioner koruuninik amerlanerupput. 33,3 koruunit tassaapput akinut akissarsianullu iluarsiissutit. Tamanna takuneqarsinnaavoq Aningaaqarnermut Naalakkersuisut Aleqa Hammondip aamma Kalaallit Nunaanni Kommuneqarfiit Kattuffiata KANUKOKA-p siulittaasuata Søren Alaufesenip ataatsimoorlutik tusagassiorfinnut nalunaarutaanni.
Illua'tungeriit isumaqatigiissutigaat kommunit ilinniagaqartitsinermik suliniuteqarnermut akiliutissaat 2009-miit siumullu 77,7 millioner koruuniussasut. Tassa 2006-imi ataatsimut tapiissutinut isumaqatigiissutip imarisaa ingerlateqqillugu.
Isumaqatigiissut tamaat atuarneqarsinnaavoq nanoq.gl-imi imaluunniit kanukoka.gl-imi.