Kommunip avinneqarnissaa misissorneqassasoq

Avannaata Kommunia illoqarfinnut kommuniusimasunut sisamaasunut avinneqaqqissava?

Kommunalbestyrelsemi ilaasortaq Anthon Frederiksen, N, taama isumaqarpoq. Taassuma siunnersuutigaa nunatsinni kommunit avannarpasinnersaata kommuninut arlalinnut avinneqaqqissasoq.

Kommunalbestyrelsep 25. novemberimi ataatsimiinnerannit imaqarniliami atuarneqarsinnaavoq siunnersuuteqartoq isumaqartoq Qaanaami, Upernavimmi Uummannami, taakkulu nunaqarfiini, Ilulissaniit qitiusumik ingerlatsisoqarneranik aalajangertoqartarneranillu naammagittaalliortoqarnera tusaanngitsuusaarneqaannarsinnaanngitsoq.

Taassuma ilanngullugu erseqqissarpaa aqutsinerup qitiusumit ingerlanneqarnerata avataatingut tamat oqartussaaqataaneranut sanngiinnerusumik kommunerujussuit pilersinneqarmata inissittoqarsimanera.

Kommuniusimasut kommuninngorteqqillugit

Naleqqami politikerip siunnersuutigaa Ilulissat, Uummannaq, Upernavik aamma Qaanaaq kommunitut nammineertutut inissinneqaqqissasut.

Kommunalbestyrelsep siunnersuutigineqartoq tunngavigalugu aalajangerpaa kommunip sisamanut avinneqarnissaanut aningaasaqarnikkut kingunissat misissorluarneqassasut, taamatullu ajoqutit iluaqutillu, kiisalu innuttaasunut sullissinerup inissinnissaa aamma misissorneqassasut.

- Siunnersuut akuerineqassanguni misissuineq ingerlanneqassooq, allattoqarfiullu misissuineq naatsorsuutingaa ukioq ataaseq ingerlasinnaasoq. Misissuineq pereerpat qulequtaq tassanilu inernerusut ataatsimiititaliamut kommunalbestyrelsimullu saqqummiunnneqassapput naalakkersuisoqarfimmut ingerlateqqinnginnerani, suliap ingerlariaqqinnissaanut siunnersuutigineqarpoq.

Nunarsuarmi kommunit annersaat ukiuni qulingiluani

Nunatsinni kommunit avannarlersaata avinneqarnissaata oqaluuserineqarnera siullermiilinngilaq.

Ilulissat nunarsuarmi kommunit annersaanni qitiusumik illoqarfiulertutut inissisimasimavoq nunatsinni kommunit 2009-mi aaqqissuunneqarmata. Qaasuitsup Kommuniatali avinneqarnissaanut oqallinneq aallartiaarsimavoq.

Qaasuitsup Kommuniani innuttaasut 2014-imi taasitinneqarmata, taasisut 79 procentiisa kommunip marlunnut avinneqarnissaa kissaatigaat.

Qaasuitsup Kommununia kommuninut marlunnut, Kommune Qeqertalimmut aamma Avannaata Kommunianut 1. januar 2018-imi avinneqarpoq.

Kommunip avinneqarnissaanik kommunalbestyrelse kissaateqarpat, Inatsisartut apeqqummut naggaterpiaatigut aalajangiisuusussaapput.