Kommunit eqqagassalerinermut suliniutinik ikiorneqassapput

Eqqakkanik isumaginninnerup pitsaanerulersinnissaa anguniarlugu kommunit aningaasatigut ikiorserniarlugit Naalakkersuisut aalajangerput.

Naalakkersuisut katillugit 15 millionit koruuninik kommuninut tapiissuteqarniarput. Aningaasat Avatangiisinut Aningaasaateqarfimmit pissapput eqqagassalerinermilu ineriartortitsinermut suliniutinut atorneqartassallutik.

- Akisussaassuseqarluni pitsaasumillu eqqakkanik ingerlatsineq peqqissutsitta, peqqinnissatta avatangiisittalu ataavartumik pitsaanerulersinnissaannut aalajangiisuuvoq. Pitsaasumik eqqakkanik ingerlatsineq iluatsissappat Naalakkersuisuni kommuninik ineriartornartumik qanittumillu oqaloqateqarneq ingerlatiinnassavarput. Kisiannili aamma kommunit nunatsinni eqqakkanik ajornartorsiuteqarnermik aaqqiissutissanik naapertuunnerpaanik nassaarniarnerinut aningaasaqarnikkut tapersiiffigerusuppavut. Tamatumani innuttaasuni peqqinnissaq toqqissisimanissarlu eqqarsaatigalugit, kisiannili aamma avatangiiserput paariniarlugu, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq nangillunilu:

Suliniummut qinnuteqaatit

- Isumaqarpunga – ataatsimiinnernilu pitsaasuni tamanna erseqqissarneqarsimavoq – inoqarfinni tamani eqqagassalerinerup pitsanngorsarnissaa kommunit pingaartingaaraat. Aammali nassuerutigisariaqarparput nunami sumiiffinni arlalinni eqqagassalerinermi suli unammilligassaqartoq. Taamaattumik maanna qilanaaraara kommunit immikkut tapiissuteqarfigineqarnissamik qinnuteqaatinik nassiussinissaat, Naalakkersuisoq Kalistat Lund oqarpoq.

Kommuni ESANI A/S-imut ilaasortaanersoq ilaasortaannginnersorluunniit apeqqutaatinnagu kommunit tamarmik immikkut ittumik tapiiffigineqassapput. Avatangiisinut Aningaasaateqarfimmiit kommunit ingerlatsinerinut tapiisoqarneq ajormat aningaasaliissutit ineriartortitsinermi suliniutinut sammitinneqassapput.