Kommunit: Jonathan qanimut oqartussaaqataanissamik pingaartitsisuuvoq
Kommunit kattuffiata KANUKOKA-p eqqaaniaaniaanermini Jonathan Motzfeldt inuinnaat qanimut naalakkersuisoqataanissaannik pingaartitsisuunerarpaa.
- Ukiorpassuarni politikeritut sulinermini nuannaajallatsitsisarsimaqaaq kommunit nammineersinnaatitaaneranni, nunaqarfinni aqutsisoqarnermi ilagiillu sinniisoqarneranni tunngaviit eriagisassat qamannga pisumik eqqartuleraangamigit. Taamaalilluni inunnut allanut kajumissaarisuusimavoq aaqqissuussinerit tamakku pimooruteqqullugit, Kanukokap siulittaasua Enok Sandgreen oqarpoq.
Jonathan Motzfeldt kommunini iluarsaaqqinnissamut kommissioni 1992-imiit 1994-imut sulisoq siulittaasuuffigaa, ingammillu atuarfeqarneq kulturimullu tunngasut soqutigisaralugit.
Naligiinneq
Aamma borgmesterit sisamat Asii Chemnitz Narup, Hermann Berthelsen, Simon Simonsen aamma Jess Svane Jonathan Motzfeldtimik nersuiniarput aqutsisutut malunnaateqarluartutut nalilerlugu.
- Juntaat ukiorpassuarni siuttuusimanermini inunnik isiginnittaaseqarpoq immikkoortitsinermik inissaqartitsinngitsoq, inoqatinili qaffasissumi appasissumiluunniit inissisimappata naligiittut isiginiartarpai, borgmesterit eqqaaniaallutik oqaatigaat.
Suleqatitut aaqqiiniartartutut sorsuutiginnikkusuttartutullu eqqaamavaat.
- Suleqatikkuminarnermigut Kalaallit Nunaannilu najukkanik tamanik ilisimasaqarluarnermigut kommunit politikkikkut inerisaaniarnerini tapersersuilluartartuuvoq, borgmestrit erseqqissaapput, aamma politikeri malunnaateqarluartoq peeruttoq erseqqissarlugu.
-Minnerunngitsumik Juntaat inuunermik nuannarisalittut akunnattoorfeqanngitsutullu eqqaamassavarput. Juntaap nipaa immikkuullarissoq, politikkikkuuppat, upperisarsiorneruppat imaluunniit inuppalaartuuppat uatsinni innuttaasunilumi qaratsatsinni ikkusimavoq, kommunini siuttut allapput.