Kommunit nutaat naagga
Naalakkersuisut kommunit nutarternissaannik pilersaaruteqanngillat, Kuupik Kleist oqarpoq
Piffissami qaangiuttumi kommunit nutaamik agguataarneqarnissaannik piumasaqaat aammalu qanga kommuniusimasut uterteqqinneqarnissaannik kissaatit iluaqqutaanavianngillat.
Taama aalajangiussisimatigisumik naalakkersuisut siulittaasuat Kuupik Kleist, Inuit Ataqatigiit oqarpoq.
- Kommuunerujussuit atulernerisa kingorna qinigaaffik siulleq suli naanngilaq. Taamaammat eqqissilaarallarta, Naalakkersuisut siulittaasuat Kuupik Kleist KNR-imut taama oqarpoq.
- Tullianik kommuunimut qinersinissaq sioqqullugu kommuunit nutaamik aggornissaat piviusorsiortuunngilaq. Piffissaq taama sivikitsigisoq atorlugu allannguut taama annertutigisoq eqqunneqarsinnaanngilaq. Aamma suli erseqqissumi kommuuniniit siunnersuummik tigusaqanngilagut. Allannguisoqassappat suliaq kommuunit namminneerlutik aallartittariaqarpaat, Kuupik Kleist oqarpoq.
Qaasuitsup Kommunia aamma Kommune Kujalleq innuuttaasut ilaasa maannamut kommuninut agguataarineq naammagittaalliutigisarpaat.
Kommunimut qinersisoqassaaq apriilimi 2013.