kræftimut katersuiniarneq
Kræft akiorniarlugu katersuiniartoqalerpoq
Nunatsinni kræftimik napparsimasut amerliartorput. Kræfti akiorniarlugu arfininngorpat Nuna tamakkerlugu katersuiniarnissaq siunertanut arlalinnut katersuiniarneruvoq
Inuit 195-it 2011-mi Nunatsinni kræftimik eqqorneqarput. Kræftimut pissutaanerpaasoq tassaavoq pujortartaneq. Pitsaaliuineq inooriaatsimillu allannguinerit kræftimut akiuiniarnermi sakkussaasut pingaartut nakorsaaneqarfik nalunaarpoq Nunatsinni innuttaasuni inersimasut 60-70-it pujortartartuummata.
Kræfti akiorniarlugu suliniaqatigiiffik Neriuffik februaarip qaammataani katersuiniarpoq aliikkusersuillunilu katersuiniarnissaq arfininngorpat pisussaq KNR-TV-mi toqqaannartumik takutinneqassaaq.
- Neriuffiit immikkoortoqarfii februarip ingerlanerani katersuiniarput illunut naasaalluni katersuiniartoqarsimalluni aammalu katersuiniarnerit assigiinngitsut atorlugit katersuiniartoqarluni, Neriuffiit Kattuffianni siulittaasoq Sara Dorthe Brandt Sermitsiaq.AG-mut oqarpoq.
Kræfteqariaatsit arlariit
Aningaasat katersorneqartussat atorfissaqartinneqarluarput. Kræftimik napparsimasut ukiut arlallit amerliartuinnavipput.
- Aningaasat atorneqartarput oqaloqatiginnittartut pikkorissarnerannut, quppersakkanut, kræfti pillugu paasissutissanik nutserinermut aammalu kræftemik eqqugaasunut legatinut, Sara Dorthe Brandt nassuiaavoq.
Siorna nuna tamakkerlugu katersuiniarnermi 601.782 koruuninik pissarsisoqarpoq ukiormannalu aningaasat qanoq amerlatigisut katersoriarneqassanersut oqaatigineqanngilaq.
- Aningaasat tamarmik pisariaqartinneqaqaat. Kræftimik napparsimasut amerliartorput kræfteqariaatsillu amerlanerit atugaalerlutik. Kræftip akiorniarneqarnera suli sakkortuninngortariaqarpoq, Sara Dorthe Brandt oqarpoq.
Inuit 45-niit qummut ukiullit puakkut kræfteqarnermit eqqugaanersaapput taamatullu napparsimasut ukiut arlalissuit amerliartuinnavipput. Nakorsaaneqarfiup 2012-mut nalunaarutaa malillugu tamanna piffissami qanittumi allanngortussaagunanngilaq. Neriunartoqarporli innuttaasut peqqissusaannik misissuinermi paasineqarmat pujortartarneq pillugu innuttaasut isiginnittaasiat allanngoriartortoq.