Kræfteqartoq sila pissutaalluni nakorsartikkiartorsinnaanngitsoq
Ole Jensenip Kullorsuarmeersup timmisartukkut angallassiniarnerit kinguaattoorfioqattaarnerat pissutaalluni kræftimi siaruaannissaa annilaanngatigaa
Upernaviup eqqaani silap unerisimannginnerata kinguneranik novemberip decemberillu qaammataanni nunaqarfinnut timmisartuussiniarnerit kinguaattoorfiusimapput. Imaatigulluunniit angallatissamik ilanngussisoqarsinnaasimanngilaq. Kinguaattoortoqaqattaarnerata malitsigisaanik kræfteqartoq Nuummut kiisami katsorsartikkiartulerpoq – pilersaarutaasumit qaammammik ataatsimik kingusinaarluni.
Aviisi AG allappoq.
Aalisartoq piniartorlu Ole Jensen Kullorsuarmeersoq septemberip qaammataani erlummigut kræfteqartoq paasineqarpoq. Erluata ilaa pilallugu peerneqarsimavoq. Peqatigitillugu nappaataanik katsorsaanissaq pilersaarusiorneqarsimavoq: sapaatip akunneri pingasukkaarlugit kemortittassasoq, katillugit arfineq-pingasoriarluni.
- Ajoraluartumik ataasiaannarlunga kemortippunga. Pilersaarutaagaluarpoq novemberip 27-ani Nuummukarnissara, aqanguanilu katsorsartinnerma aallartinneqarnissaa. Putsertarnerali pissutaalluni timmisartut kinguaattooqattaarmata kemortinngitsoorpunga. Nakorsat decemberip qaammataani aalajangersimapput kemomut taarsiullugut nakorsaatinik katsorsartikkallassasunga. Nakorsaatit decemberip 17-iani nassiunneqarsimapput, maannali nakorsaatissakka suli tikinngitsut Nuummukarlunga aallarpunga, Ole Jensen oqaluttuarpoq.
Nappaatip inuunermik naleqarsinnaasup katsorsarniarnerata kinguaattoorfiunera aamma tarnikkut naleqarsimavoq.
Ole Jensen pillugu oqaluttuaq tamaat AG-mi atuaruk – ilanngutassiaq ugguuna iserfigisinnaavat: