Kræftimik napparsimasunut katsorsaanerit annertusisat: Qanoq pisoqassanersoq suli ilisimatitsissutigineqanngilaq
Kræftimik napparsimasunut katsorsartinnissamut neqeroorutit decemberimili amerlineqartut qanoq ingerlateqqinneqassanersut pillugit Naalakkersuisut suli oqarsinnaanngillat. Misiliut junip 30-ata tungaanut atuutsinneqarallartunngorlugu aalajangerneqarnikuuvoq.
Nunatsinni kræftimik napparsimasunut katsorsaanerit amerlenerulertinneqarnerannut tunngatillugu nalilersuinerit utaqqineqaqqaarallarput siunissami neqeroorutinik pilersaarutit saqqummiutinnginnerini.
Kræftimik napparsimasut katsorsartissinnaanerat Danmarkimisulli annertusineqarsimavoq decemberimi. Misiliut juunip naanissaata tungaanut atuutsinneqarpoq.
Ullumikkut 26. juniugaluartoq, periutsinik annertusaanerup kinguneri pillugit nalilersuinerit Peqqissutsimut Naalakkersuisup Mimi Karlsenip suli utaqqivai, taamaattumillu pilersaarutissanik suli oqaaseqarsinnaanani.
Kræftimik napparsimasunut katsorsartinnissamut neqeroorutit Danmarkimi nunatsinnilu nikinganerat pillugu oqallinneq ukiaq 2022-mi annertungaatsiareersorlu, Naalakkersuisut annertusaallutik suliniuteqarsimapput.
Misiliutit suli nalilersorneqarput
Neqeroorutit annertusisat ingerlatiinnarneqassanersut, unissanersut, ukiullu affaani kingullermi qanoq issimanersut pillugit peqqissutsimut Naalakkersuisoq Sermitsiaq.AG-mit apersorniarneqarsimagaluarpoq.
Neqeroorutinik annertusaaneq 30. juni tungaanut atuuppoq. Annertusaanerup atuutsilivinnissaanut allaffissornikkut, aningaasaqarnikkut ingerlatsinikkullu sunniutissai qanoq issanersut takuniarlugit, neqeroorutit annertusineqarsimapput.
Naalakkersuisoqarfik ilisimatitsivoq paasissutissat tamakkiisut pigineqalerpata naalakkersuisoq avammut nalunaaruteqarumaartoq.