Kristian J: Inatsisartut namminerisaminnik radioqalerlit
Inatsisartunut ilaasortaq Kristian Jeremiassen, Siumut, inatsisartut adiokanaleqalenissaat siunnersuutigaat innuttaasut inatsisartut ataatsimiinnerannik kipitinneqaratik tusarnaarsinnaaqqullugit.
– Isumaqarpunga innuttaasut inatsisartut ataatsimiinnerat tamakkerlugit tusarnaarnissaannut periarfissinneqartariaqartut, aamma isumaqarpunga nunap aqunneqarneranut ammasumik inuuttaasut malinnaanissaat periarfissinneqartariaqartoq, demokratiskimik aqunneqartumik inuugatta, Kristian Jeremiassen Intasisartut siulittaasuannut Josef Motzfeldtimut allappoq.
Kristian Jeremiassenip tunngavilersuutigaa inatsisartut ataatsimiinneri toqqaannartumik aallakaatinneqartartut KNR-imit kipitinneqaqattaartarneri.
– Isumaqarpunga eqqortuliornerunngitsoq isumaqatigiinniarnerit ingerlanerisa nalaanni inuit tusarnaartut killilersorneqarnerat. Isumaqatigiinniarnerit pissanganarseruttortut tusarnaartut toqqaannartumik aallakaatitamit malinnaasinnaajunnaartitaasarput nalunaaqqutaq 16:30.
Kristian Jeremiassen isumaqarpoq radiomi allamik kanaleqartariaqartoq inatsisartut ataatsimiinnerat tamakkerlugit aallakaatitsisinnaasumik taamaasillunilu KNR-ip nammineq aallakaatitassiaminik aallakaatitsinissaa aamma periarfissinneqarluni.