Krusep piliapalaavisa biologit siunnersuinerat qaangerpai
Qalerallit Avannaani pisarineqartut tallimaagaangata ataaseq qaleralinnik pisassiissutitaqanngitsunit aalisarfinnit pisaasarpoq
Piffinni pisassiissutitaqanngitsuni qalerallit pisat, nammanneqarsinnaasumik aalisarnermut sinaakkutaannik qaangiipput.
Aviisi Sermitsiaq taama allaaserisaqarpoq.
Piffinni pisassiissutitigut aqutsisoqarfiusuni Qeqertarsuup Tunuani, Uummannami, aamma Upernavimmi siorna pisat 20.252-iusut kisitsisit nutaat takutippaat. Biologit siunnersuinerannit 19.200 tonsiusunit taamaallaat 1.000-mik qaangiipput.
Kisiannili suli amerlanerupput, Avannaani pisassiissutitaqanngitsunit pisat ilanngunneqarpata. Taakkumi ilanngunneqartariaqarput, tassami qalerallit soqutiginngilaat pisat aalisarfinnit inuit akornanni oqartarnerattut Krusep piliapalaavineersuugaluarunik allaminngaanneeraluarunilluunniit. (Karl-Kristian Kruse, Siumut, 2014-imi Inatsisartut upernaakkut ataatsiinneranni immap assigani titartaavoq, taamaalilluni qaleralinniarneq Qeqertarsuup Tunuata, Uummannap Upernaviullu ilarujussuanit aalisartoqarsinnaalersillugu, naak killeqanngitsumik aalisartoqarnissaata aalisakkanik ikiliartortitsisoqarnissaa biologinit mianersoqqussutigineqaraluartoq.).
2018-imi piassiissutitaqanngitsunik qaleralinniarnermit aalisarfinneersut pisat 4.325 tonsiusimasut Kalaallit Nunaanni Aalisarnermut Nakkutilliiveqarfiup ilisimatitsissutigaa
Taamaalilluni Nunatta Avannaani qaleralittat katillugit 24.577 tonsiusimapput – imaluunniit biologit siunnersuinerat 5.377 tonsinik qaangerlugu pisaqartoqarsimalluni.
Tamanna pillugu aviisimi Sermitsiami paasisaqarnerusinnaavutit, uani ataani linki aqqutigalugu aviisimut isissutissarsisinnaavutit: