KTI issittormiut inuusuttaanik katersuutsitsivoq nunat tamalaat ilinniartitaanikkut suliniutaannut atatillugu
Tech College Greenland/KTI Aatsitassanut ilinniarfik, suliniummut Arctic Resilient Communities Youth Fellowship (ARCYF) peqataavoq, suliniummilu inuusuttut Alaskamiit, Canadamiit aammalu nuantsinniit peqataapput aqutsisussatut piukkunnarnerat annertusarneqarluni.
Ilinniartitaanermut suliniut ARCYF Canadap naalakkersuisuinit aningaasalerneqarpoq, inuusuttunullu siunissami issittumi aqutsisussatut piukkunnaateqartunut sammititaalluni.
Suliniummi peqataapput inuusuttut 21 Alaskameersut, Canadameersut Nunatsinneersullu, taakku ilisimasaminnik misilittakkaminnillu avitseqatigiipput kiisalu issittumi killeqarfiit akimorlugit attaveqaqatigiinnermik pilersitsillutik.
ARCYF-mi peqataasut akornanni ilaapput kattuffinneersut ilaatigut US Government Fish and Wildlife, Institute of the North og North Star Group-imeersuullutik. Iluatsilluartumik Anchorage, Alaska-mi ataatsimoorlutik isumasioqatigeereerlutik, peqataasut Kalaallit Nunatsinnukarput, ullunilu 16. - 19. august Sisimiuni katersuullutik.
Nunatsinni ilinniartitaaneq paasisaqarfigivaat
Peqataasut Sisimiuniinnerminni KTI-mi aatsitassarsiornermik ilinniarfimmit tikilluaqquneqarput, taanna tikeraartoqarnermi aaqqissuisuummat aammalu ataatsimiinnerit aaqqissuussinerillu allat aaqqissormagit.
Peqataasut KTI-p ilinniartunut inissiaataani kollegiani inissinneqarput, taamaalillutillu ilinniarfiup ilinniartuutaasa ilinniarnerminni atugai qanoq ittuunersut paasisaqarfigisinnaalerpaat kiisalu aamma suliffeqarfiit kattuffiillu pingaaruteqartut allat, soorlu Qeqqata Kommunia, Arctic Circle Business aammalu Arctic DTU Sisimiut paasisassarsiorfigisaasa ilagaat.
KTI-mit immikkut qujaffigineqarput qimussertartut peqatigiiffiannut Qimusseq Sisimiunut, taakku isumassarsiorluarnartumik uummaarissumillu kalaallit qimussertarnerat qimuttunillu qimmeqartarnerat pillugu oqalugiaateqarnikuummata.
Tamatuma saniatigut aamma Sisimiut Katersugaasiviat nersualaarneqarpoq qanga kalaallit inooriaasiannik kusanaqisumik saqqummersitsinerannut, aammalu nalinginnaasumik ammasarfiup avataani tikeraanut ammatitsisimammata.
Nuuk tikeraarneqarpoq
Sisimiuniinnerminni aaqqissuussineq ataqatigiissaarinerlu minnerunngitsumillu ineriartortitsinissamut pilersaarutit Qeqqata Kommunianit siuttuuffigineqartut ARCYF aqqutigalugu tikeraat assut nersualaarpaat.
Aaqqissuussaq imaqarluartoq Sisimiuni aqqusaareerlugu peqataasut Nuummukarput, tassanilu misigisassat nutaat ARCYF-mi peqataasut aamma aqqusaarlugit.
Tech College Greenland (KTI-p aatsitassarsiornermut ilinniarfia) ARCYF-mi suleqatitsialattut nersorniarneqarpoq aammalu inuusuttut aqutsisuunissaminnut piukkunnaatillit issittumi inuiaqatigiinnit assigiinngitsuneersut attaveqaqatigiinnerannik nukittorsaaqataalluarsimassasoq qularutigineqanngilaq aammalu issittumi assigiinngitsutigut aqutsisunut ilaalerumaartussatut piukkussat taakku piujuartitsinerup aqqani issittup ineriartortinneqarnissaata pingaaruteqassusia paasisaqarfigilluarsimagaat qularutigineqanngilaq.