Kuannersuit: Isumaqatigiissitsiniartarfimmi suliamik ingerlatsisoqassanersoq suli qularnarpoq

ETM isumaqatigiissitsiniartarfimmi suliamut unnerluussummik takisoorujussuarmik tunniussisimagaluartoq suliaq isumaqatigiissitsiniarnikkut aaqqiivigineqassanersoq suli nalunarpoq. Namminersorlutik Oqartussat isumaqarput Kalaallit Nunaanni Eqqartuussivinni suliassaasoq, kisianni suliaq sumiluunniit suliarineqalersinnagut tamanna Danmarkimi isumaqatigiissitsiniartarfinni naliliisartunit aalajangiivigineqassaaq.

Mads Dalegaard/Ritzau Scanpix

merete lindstrøm

Published 20 July 2023 - 10:44

Annonse

Energy Transition Minerals Ltd (ETM) isumaqatigiissitsiniartarfimmi suliamut pisariusumut piareersimavoq, tamatumanilu naammagittaalliuummik 517-inik quppernilimmik 1000-illu sinnerlugit bilagitalimmik tunniussisimallutik.

Isumaqatigiissitsiniarneq sunaava

Danmarkimi inatsisini aallaaviuvoq inuinnaat saqitsaassutaasa eqqartuussivinni aalajangiivigineqartarnerat. Periarfissaq alla tassaavoq isumaqatigiissitsiniarneq. Isumaqatigiissitsiniarnermi eqqartuussivinni suliarinninnermut sanilliullugu illuatungeriit saqitsaassummik isumaqatigiissitsiniarfimmi aalajangiisitsinissamik isumaqatigiissimasarput.

Illuatungeriit inatsisinut tunngasumik aalajangersimasumik saqitsaassummi aalajangersimasumi imaluunniit siunissami saqitsaassutaasussani isumaqatigiissimaneq saqitsaassutip eqqartuussivinni suliarineqartussaannginneranik isumaqartarpoq, tamatumali akerlianik illuatungeriit isumaqatigiinnerisigut isumaqatigiissitsiniartarfimmi pilersinneqarsimasuni aalajangiivigineqartussaasarluni.

Isumaqatigiissitsiniartarfik naliliisartumik ataatsimik arlalinnilluunniit illuatungeriinnit toqqarneqartunik inuttaqartarpoq. Isumaqatigiissitsiniarnerup taamaalilluni ilisarnaatigaa, illuatungeriit eqqartuussivinnukaratik "eqqartuussivimmik namminersortumik", isumaqatigiissitsiniartarfimmik pilersitsinerat, saqitsaassummik illuatungeriinnut pituttuisuusumik sunniuteqartumik aalajangiisussamik. Tamatumunnga tunngavik tassaavoq illuatungeriit akornanni isumaqatigiissitsiniarnissamik isumaqatigiissut.

Najoqqutaq: Dansk Forening for Voldgift

Aatsitassarsioqatigiiffik isumaqarpoq, itigartitsineq urani pillugu inatsimmik 2021-meersumik tunngaveqartoq inatsisinik unioqqutitsinerusoq, taamaattumillu ajugaassagunik itigartitsinermut 76 milliarder koruunit missinginik taarsiivigineqarnissamik piumasaqaateqarlutik.

Naammagittaalliummi suliami suut pineqarnerat EMT-illu tunngavilersuutinik sunik saqqummiussaqarnera tigussaasumik qulaarneqarpoq.

Kisianni naammagittaalliuut suliarineqalersinnaagut isumaqatigiissitsiniartarfimmi aalajangiisartunit isummerfigneqassaaq suliap suliarinissaanut pisariaqartumik piginnaaneqarnerlutik. Naalakkersuisut tunngavilersuutigiuarsimavaat suliaq Danmarkimi isumaqatigiissitsiniartarfimmi suliarineqartussaanngitsoq akerlianillu isumaqarlutik ETM-ip suliaq Kalaallit Nunaanni Eqqartuussiviit aqqutigalugit malersussagaa.

Sermitsiaq.AG Aningaasaqarnermut, Naligiissitaanermut, Aatsitassanut Inatsisillu Atuutsinneqarnerannut Naalakkersuisumit Naaja Nathanielsenimit (IA) suliaq pillugu oqaaseqartitsiniarsarivoq.

ETM qinnuteqaammik nutaamik tunniussaqarsimasoq

Naalakkersuisut suliaq isumaqatigiissitsiniartarfimmi suliarineqassanersoq pillugu januaarip tungaanut tunngavilersuuteqarnissamut akerliliissutinillu saqqummiussaqarnissamut piffissalerneqarsimapput. Aatsaat januaarip kingorna aalajangiisoqassaaq tamatumalu kingorna isumaqatigiissitsiniartarfimmi suliaq aallartissinnaalissalluni, taamaattoqarnissaa inerniliunneqassappat.

Isumaqatigiissitsiniarnermut tunngasut saniatigut Naalakkersuisut ET-mimit ilassutitut qinnuteqaammik suliaqaleruttorput. Taakkua Kuannersuarni piiaanissaq pillugu qinnuteqaammik nassiussaqarsimapput, tamatumanilu uranimik piiaanermut tuniniaanissamullu taarsiullugu urani saffiugassanit qaqutigoortunit avissaartinneqareeraangat nunamut utertinneqartassalluni. Urani ilanngunnagu saffiugassanik qaqutigoortunik piianissaq ajornarpoq.

Naalakkersuisut ilassutitut qinnuteqaammik aamma itigartitsinissaat ilimagisariaqarpoq, Naalakkersuisoqarfik siusinnerusukkut tunngavilersuuteqarsimammat, uranip piiarneqarnissaa, avammut nioqqutigineqassanngikkaluarpalluunniit, aatsitassat pillugit inatsimmut uranilu pillugu inatsimmut akerliusoq.