Kujalleq eqqaavissuarni ikuallaaniarpoq
Kommune Kujalliup Narsami, Nanortalimmi nunaqarfinnilu eqqakkat pillugit annertuumik unammilligassaqartoq eqqumaffigilerpaa. Kommunilu immikkut akuersissuteqarluni eqqakkanik ikuallaasinnaanermut Naalakkersuisunut qinnuteqarniarpoq.
Narsami Nanortalimmilu eqqakkat annertuumik ajornartorsiutaapput. Illoqarfinni nunaqarfinnilu eqqakkanik ikuallaasinnaanissamut immikkut qinnuteqarnialersoq, Kujallermi teknikkimut avatangiiseqarnermullu ataatsimiititaliami siulittaasup, Piitaq Lundip oqaatigaa.
- Ullut 14-it matuma siorna sulisuvut eqqakkanut tunngatillugu misissuinissaanut noqqaasuteqarfigaagut. Taakkununngalu immikkut akuersissuteqarluni ikuallaanissamut qinnuteqartoqarnissaa suliakkiisutaanikuuvoq, teknikkimut avatangiiseqarnermullu ataatsimiititaliami siulittaasoq, Piitaq Lund (IA) taama Sermitsiaq.AG-imut oqarpoq.
Sermitsiaq.AG plastikkinik eqqakkanillu Nanortalimmi annertuumik mingutitsisoqartoq illoqarfiullu iluani eqqakkat sumi tamaani teqqaasartut uppernarsarlugu qanittukkut saqqummiuppa. Kommunalbestyrelsi eqqaavissuarnut tunngatillugu immikkut maluginiagaqarsimanngitsut teknikkimut avatangiiseqarnermullu ataatsimiititaliami siulittaasup nassuerutigaa.
- Eqqakkat nassiunneqartalernissaasa tungaanut (ikuallaavinnut red.) ikuallaasinnaanissaq qinnutiginiarparput. Oqaatigisariaqarpoq kommunalbestyrelsi nutaaq ivertinneqarmalli eqqakkat eqqumaffiginngitsoorsimagigut, kisianni massakkut eqqumaffigilerpagut aaqqiisoqarnissaanullu sulissuteqarluta, Piitaq Lund oqarpoq.
Naalakkersuisoq: Ikuallaaneq kingullerpaatut periarfissaasaaq
Inoqarfinni tamaginni isumannaatsumik eqqagassalerinermik kommunit qulakkeerinninnissaat pingaaruteqartoq, ikuallaanerlu aaqqiissut pitsaanerpaanngitsoq, Avatangiisinut Naalakkersuisup, Kalistat Lundip erseqqissaatigaa,
- Eqqumaffigeqqussavara ammasumi ikuallaaneq periarfissatut kingulliusussaammat, tassami tamanna aaqqiissutissatut attanneqarsinnaanngilaq, aammalu ammasumi ikuallaanneq innuttaasunut akornutaasumik aarlerinartoqarneranik aamma kinguneqartarmat mingutitsisinnaanerullu aarlerinaateqarneranik malitseqartarluni. Naalakkersuisut inassutigaat eqqakkat tamarmik poortorneqartassasut aammalu kommunip ikuallaavianut assortorneqartassasut, Kalistat Lund Sermitsiaq.AG-imut oqarpoq.
Taassuma aamma ilaatigut erseqqissaatigaa Nunarput tamakkerlugu eqqagassalerinerup pitsanngorsarneqarnissaa Naalakkersuisut kommunit suleqatigalugit ukkatarigaa.
Kujallerli ikuallaasinnaanermut immikkut akuerineqassanersoq suli nalunarpoq, tassami Naalakkersuisut aalajangiisuusussaammata.