Kujalleq: Inuit Ataqatigiit Atassummut suleqateqarnini unitsippaa
Kommune Kujallermi Inuit ataqatigiit Atassummut suleqateqarnini unitsillugu aalajangerpoq. Taakkumi isumaqarput Atassutip kulturimut sunngiffimmilu ataatsimiititaliaq naammaginartumik siuttuuffiginngikkaa.
Kommune Kujallermi Inuit Ataqatigiit siuttuulermata Atassummut isumaqatigiissusiorput. Kulturimut sunngiffimmilu ataatsimiititaliaq naammaginartumik aqunneqannginnera, Inuit Ataqatigiit partiimut suleqarteqarunnaarneranut peqqutaavoq.
- Ajoraluartumilli maannamut ingerlatsineq naammaginarsimanngilaq, ilaatigut qaamatit tamaasa ataatimiittoqartarani. Suliassat imaannaanngitsut utaqqipput, ilaatigut 2030-imi aalanerulernissamik siunertaqarneq nammineerluni takkunnavianngitsoq nalunngilarput, Piitaq Lund (IA) tusagassiuutinut nalunaarummi taama ilaatigut oqarpoq.
Inuit Ataqatigiit suleqateqarunnaalernerminni oqaloqatigiittoqarsimasoq paaseqatigiiffiusumillu pisoq erseqqissaapput. Kim Ezekiassen Atassutimeersoq kulturimut ataatsimiititaliami siulittaasuusimavoq. Taanna qinersinermi 95-inik taaguunneqarluni kisiartaalluni Atassummiit kommunalbestyrelsimut iserpoq.
Kulturimut sunngifffimmilu ataatsimiititaliaq pingaaruteqarpoq
Ataatsimiititaliaq avataaniit tikisitsiniaanermi pingaarutilittut inissisimasoq Kommune Kujallermi Inuit Ataqatigiit isumaqarput.
- Aammattaaq kommuunitut tikikkuminassutsitsinnut inerisaalluassagutta susassaqarfik pineqartoq annertuumik akisussaaffeqarpoq suliassaqarlunilu. Isumaqarpugut pitsaanerusumik politikkikkut susassaqarfik pineqartoq siulersorneqartariaqartoq, Piitaq Lund oqarpoq.
Inuit Ataqatigiit apriilimi qinersinermi qinersiseqarnerpaavoq, taakkua arfineq-pingasunik kommunalbestyrelsimi ilaasortaatitaqarput, Siumut arfinilinnik ilaasortaatitaqarput Atassullu ataatsimik ilaasortaatitaqarpoq.