Kujalleq: Isumaginnittoqarfiup oqarasuaatit ammatinneri killilerpai

Kommune Kujallermi innuttaasut isumaginnittoqarfimmut sianerniartarnertik piffissami kingullermi ajornakusoortissimavaat. Tamassumunngali peqquteqarpoq, oqarasuaatimmi saaffiginninnissamut aalajangersimasumik piffissalerneqarsimapput.

Kommune Kujallermi isumaginnittoqarfimmi pisortaq, Nielsine Petersen, maanna erseqqississaassuteqarpoq innuttaasut qaqugukkut sianersinnaanerat pillugu.

Innuttaasut sianerfissaasa saniatigut isumaginnittoqarfimmi sullissisut sullitaminnik oqaloqatiginnittarput, ataatsimiittarput allaffissornermillu suliaqarlutik, pisortaq ilisimatitsivoq.

- Piffissami kingullermi Kommune Kujallermi innuttaasut Isumaginnittoqarfimmut saaffiginnikkaluarlutik iluatsitsisannginnginnerat oqariartuutigineqarluni uagutsinnut apuunneqartarpoq. Taamaattumik saaffiginniffissat qaqugu pisarnerat innuttaasunut saqqummiutissallugu maanna tulluartuuvoq, Isumaginnittoqarfimmi pisortaq Nielsine Petersen oqarpoq.

Akunneq ataatsip iluani sianertoqarsinnaasoq

Innuttaasut sullissisumik oqaloqateqarusuttut ataasinngornermi, marlunngornermi, sisamanngornermi aamma tallimanngornermi nalunaaqutaq 14.00-15.00 akornanni sianersinnaasut ilisimatitsissutigineqarpoq.

Piffissap sinnera sullissisut allanik suliaqartarput.

Innuttaasunik saaffiginnittunik oqaloqateqarnerup saniatigut isumaginnittoqarfik inatsit atuuttoq naapertorlugu isumaginninnerup iluani suliaqartussaavoq.

- Sullissinneq, oqaloqatiginninneq, misissuineq allaffissornerlu toqqammavigalugit piffissaq aaliangersimasoq oqarausaatikkut sullissisinnaaneq atuutsinneqalerpoq, tassa ulluinnarni nal. 14.00-miit 15.00 tungaanut. Ullup sinnera oqarasuaat matoqqasarpoq, tamatumani pissutaavoq sullitanik oqaloqatiginninnerup inissaqarluartariaqarneranik, taamatuttaaq suliassat inatsit toqqammavigalugu sullissineq ingerlanniassagatsigu, Nielsine Petersen oqarpoq.

Kommune ilisimatitsivoq pinartoqartillugu innuttaasut pigaartumut sianertuaannarsinnaasut.

Oqarasuaatit:

Qaqortoq: 49 34 35

Nanortalik: 53 75 41

Narsaq: 49 72 03