Kujalleq kommuninut saaffiginnittoq - suleqatigiinnerunissaq neriuutigineqartoq
Nunami atuarfiit pitsaanerulersinniarlugit kommunit misilittakkanik paarlaasseqatigiinnerusarlutillu suleqatigiinnerulertariaqarput. Taamatut isumaqarput Kommuni Kujallermi kommunalbestyrelsimi ilaasortat arlallit.
Kommunini politikkikkut ataqatigiissaarisoqareeraluartoq, Kommuni Kujallermit kommunit allat saaffigineqarniarput, tassani kommunalbestyrelsit ataatsimiititaliaanni kommunillu ingerlatsiviini unammilligassaasartut pillugit suleqatigiinnerusoqalernissaa misilittakkanillu pitsaasunik avitseqatigiittoqartarnissaa anguniarlugu.
- Ingerlatsivimmi pisortap Jesper Ryttovip kommunit sineriammiittut tamaasa saaffigai suleqatiseralugit, neriuutigaarpullu suleqatigiinnissamik kissaateqarnerput kommuninit tamanit tigulluarneqassasoq. Atuarfeqarfinnimi assigiinngitsunik unammilligassaqartoq isiginngitsuusaaginnarsinnaanngilarput, taamaammat tamanna siullertut ukkatariniarparput, Kommuni Kujallermi borgmesterimut tullersortaasoq kommunalbestyrelsimilu ilaasortaq Magrethe Thårup Andersen (S) oqarpoq.
Kommuninut tamanut iluaqutaassasoq
Kommunit suleqatigiinnerulerlutillu misilittakkaminnik avitseqatigiittalerpata, tamanna kommuninut tamanut iluaqutaassasoq, Margrethe Thårup Andersen isumaqarpoq.
- Qularutiginngilara tamanna kommunit tamarmik innuttaasullu aningaasaqarnerannut pitsaanerpaassasoq, taamalu atuarfinni meeqqat atugaannik piginnaasaannillu pitsanngorsaassalluni. Ilisimaaraara nuna tamakkerlugu politikkikkut ataqatigiissarisoqareersoq, isumaqarpungali suleqatigiinnerusinnaaneq kommunini ataatsimiititalianut pingaaruteqartoq, Margrethe Thårup Andersen (S) naggasiivoq.