Kujalleq: Nutaamik suleqatigiissusiortoqartoq

Kommune Kujallermi Inuit Ataqatigiit ukioq ataaseq sinnerlugu suleqateqanngereerlutik politikkikkut suleqatissaminnik nassaarput.

Inuit Ataqatigiit aamma Demokraatit qinigaaffiup naammassinissaanut - 2025-p tungaanut - suleqatigiinnissamik isumaqatigiissuteqarput.
Published

Inuit Ataqatigiit aamma Demokraatit qinigaaffiup sinnerani suleqatigiissutissaminnik 19. juni atsioqatigiipput.

Illuatungeriit isumaqatigiipput piginnaasanik atorluaasinnaanermut pilersaarusiornissaq ukiuni tullerni sulissutigissallugu.

- Upperaarput nammineerluta pilersitatsinnik kommunerput siuariartortissinnaallugu, aqutsinikkullu naleqartipparput innuttaasut siuariartornernut piginneqataasut akuutinneqartutullu misigisimasut. Taamaammat kommunitsinni piginnaasatta atorluarneqarlutik pilersaarusiorfigineqarnissaat Inuit Ataqatigiit Demokraatillu siuttuuffigissavaat, Kommune Kujallermi Borgmesteri Stine Egede (IA) kommunip nittartagaani oqarpoq.

Ukiut aappassaa avillugu suleqateqarsimanngitsut

Inuit Ataqatigiit kommunemi politikkikkut kisiartaallutik januar 2022-mili ingerlatsipput. Atassut januar 2022-mi suleqatigineqarunnaarsimavoq, kulturimi sunngiffimmilu akisussaaffimmik tigumminninnera naammagineqannginnera pillugu.

Atassut kommunalbestyrelsemi kingorna ilaasortaatitaqarunnaarpoq, ilaasortaasoq Siumumut nuummat.

Margrethe Thaarup Andersen, Demokraatit sinnerlugit Inuit Ataqatigiinnik suleqateqarnissamut atsiorpoq. Taanna Siumumi ilaasortaasimagaluarluni, Demokraatinut martsimi nuuppoq.

- Kommune Kujalleq ataatsimoornikkut nutaaliornikkullu ineriartorfiunissaa kissaatigaarput, innuttaasut sinniisaasa suliassaraat ataatsimoorfiusumik siuariartortitsineq, Kommune Kujallermi kommunabestyrelsimi ilaasortaq Demokraatineersoq Margrethe Thaarup Andersen (D) oqarpoq.

Narsarsuup siunissaa aalajangerneqassaaq

Isumaqatigiittut illoqarfinni aqquserngit iluarsaannissaannik anartarfilerinerullu pitsanngorsarnissaanik isumaqatigiissuteqarput. Kommunimi inuussutissarsiornerup siuarsarnissaa angerlarsimaffinnilu erngup kuuginnartunngornissaa aamma sulissutigineqassaaq.

Narsarsuulli siunissaata aalajangiiffigineqarnissaa politikkikkut kissaatitut aamma siunniunneqarpoq. Tamanna sulissutigineqassaaq naak Narsarsuarmi innuttaasut Naalakkersuisunit ilisimatinneqareersimagaluartut Qaqortumi mittarfik atulerpat Narsarsuaq timmisartunut atorunnaarneqassasoq.

- Qaqortumi mittarfiup pilersinneqarnissaa utaqqinagu, Narsarsuup qanoq siunissami atorneqarnissaa pineqartut peqatigalugit ingerlanneqassaaq. Maannamut suliat ingerlareersut Naalakkersuisut peqatigalugit pingaartillugillu nangeqqinneqassapput. Kommune Kujalleq silaannakkut avammut attaveqartuassasoq qulakkeerneqassaaq, ukiorlu kaajallallugu timmisartuussisinnaasumik ujartuisoqassalluni, suleqatigiinnissamut isumaqatigiissummi allassimavoq.

Narsarsuarmi akunnittarfiup nutarterneqarnissaa Naalakkersuisunut suliakkiutigineqassasoq, suleqatigiit aamma isumaqatigiipput.

Powered by Labrador CMS