Kujalleq silaannaap nakkutilliiveqarfissaanik pileriginnippoq
Kommune Kujallermi borgmesteri, Stine Egede (IA) nuannaarpoq Naalakkersuisut ingerlatsivinnik suliffeqarfinnillu siammarteriniarmata. Tigussaasoq nutaanerpaaq, tassalu silannartatta nakkutilliiveqarfissaanik nunatsinnut nuussinissaq pillugu Kommunalbestyrelsimit akuersissummik perusuppoq, nakkutilliiveqarfik Kommune Kujallermut inissinneqassasoq noqqaanissaminut.
- Assorsuaq iluarisimaarnarpoq Naalakkersuisut sulissutigilermassuk pisortat ingerlatsivii suliffeqarfiilu nunarput tamakkerlugu siammasinnerusunngorlugit inississuiniarlutik sulissutiginnimmata. Tamannami piffissami sivisuumi utaqqinikuuarput, Kommune Kujallermi borgmesteri, Stine Egede (IA) naammagisimaarinnilluni oqarpoq.
Stine Egedep taamatut oqarnermini innersuussutigivaa Ineqarnermut Attaveqaasersuinermullu Naalakkersuisup Hans Peter Poulsenip qanittukkut ersarissaanera ingerlatsiviit suliffeqarfiillu Nuup avataanut siammarterneqarnissaat Naalakkersuisut sulissutigigaat, maannalu tigussaasumik sulissutigineqartoq silaannartatsinni angallannermut nakkutilliiveqarfiup Nuup avataanut inissinneqarnissaa.
Egede periarfissamik akorsilluni kissaatiginnippoq nakkutilliiveqarfissaq Kommune Kujallermut inissinneqassasoq:
- Maanna sulissutigaarput kommunalbestyrelsip pingasunngornermi 14. februar ataatsimiinnissaani piginnaatitsissummik pissarsinissarput. Piginnaatitsissummik tunuliaquttavut tunniussissappata, ingerlaannartumik Naalakkersuisunut attaveqassaanga kissaat pillugu oqaloqatigiinnissamik aallartitsiumallunga, tassami attaveqaqatigiinnikkut atortorissaarutit pinngitsoorneqarsinnaanngitsut maani pigaagut, internet eqqaaginnarlugu, attaveqaqatigiinnikkut ajutoortoqassagaluarpat Islandimiit aammalu Amerika avannarlermiit ikiorneqarnissatsinnut periarfissaqarpugut.
Sumerpiarmiissanersoq tikkuaasinnaanngikkallarpoq
Borgmesteri kissaateqaraluarluni nakkutilliiveqarfik Kommune Kujallermiissasoq, taamaattoq maannangaaq oqarsinnaanngilaq sorpiarmiitinneqassanersoq pillugu:
- Tamanna siusippallaarpoq, tassami kommunalbestyrelsip isummersorfigalugulu piginnaatitsissut tunniuteqqaartariaqarpaa, tamatumalu kingorna Naalakkersuisunut saaffiginnissaagut, taakkumi Danskit angallannermut ministeriaqarfiat suliaq pillugu attaveqaqatigaat, oqartussaasuuseq nakkutilliinermillu ingerlatsineq taakku tigummisarimmassuk. Taamaammat siusippallaarpoq taamaatut kissaateqarnerput pillugu itisiliinissamut, taamaattorli kommunitut qanoq iliorsinnaanerput aammalu kissaaterput iluatsissagutsigu kommunitut oqartussaaffitta iluani piareersarusuppugut, piareersimalluaruttami nakkutilliiveqarfimmi sulilerumaartussat avataaniit tikittussat tikilluaqqulluarnerusinnaassavagut piareersimaffigilluarnerisigut, Stine Egede nassuiaavoq nangillunilu:
- Kissaaterput angusinnaassagutsigu aamma naatsorsuutigaara, inuit suliamik ingerlataqartut suliaminnut ilisimaarinnilluartut innersuussuteqarumaartut sumerpiarmiitinneqarnissaanut innersuussiumaartut, taamaattorli isumaga malillugu Nunatta Kujataa nakkutilliiveqarfiulersissallugu piukkunnarnerpaavoq.
2031-ip tungaanut kommuni piareersarusuppoq
- Kommunip tungaaniit kissaatiginaqaaq maannangaaq piareersalereernissaq, tassami suleqataasussarpassuit nuunnissaat, ineqarnikkut meeqqeriveqarnikkullu atugassaat allatigullu maanga nuunnerminnut atatillugu pisariaqartikkumaagassaat kommunillu toqqaannartumik sulissutigisinnaasai piareersarluarusunnarput, Kommune Kujallermi borgmesteri, Stine Egede (IA) nassuiaavoq.
Aamma Danskit angallannermut ministeriaqarfianniit aammalu Naalakkersuisut tungaanniit kissaatigineqarmat nakkutilliiveqarfik Nunatsinniit ingerlanneqassasoq aammalu sulisussat isumalluutigisat nunatsinneersuunissaat ilanngullugu ingerlanneqalissasoq, taava innuttaasut suliamik kivitsisinnaasut naammattut piginissaat isumannaarniagaasat ilagaat:
- Assut iliuuseqarusuppugut, pingaartumik inuusuttut suliassaqarfiup iluani aallartisinneqarnissaannut pilerisaareqataalluta. Taamaammallu sapinngisamik siusissukkut nalujunnaarutsigu ilumut Kommune Kujallermut inissinneqarsinnaasoq, 2031 nallertinnagu ilinniartitaanikkut piareersaaqataanissap isumaginissaanut periarfissarissaarnerussaagut, Kommune Kujannermi borgmesteri, Stine Egede (IA) nassuiaavoq.