Kujallermi Siumumi ilaasortat marluk matu matorluppaat
Siulliulluni Margrethe Thaarup Andersen Siumumit anivoq. Maannalu Simon Simonsen aamma Karen Marie Kyed Frederiksen ingerlaannaq atuutilersumik partiimit anissallutik aalajangerput. Kujallermi kommunalbestyrelsimi Siumut sinnerlugu qinikkat arfiniliugaluaramik maanna pingasuinnanngorput.
- Ataatigut atsiortugut, Simon Simonsen aamma Karen Marie Kyed Frederiksen, allakkat uku atorlugit nalunaarutigissavarput ingerlaannaq atuutilersumik Siumumi ilaasortaajunnaarniarluta aalajangeratta.
Partiimit anisut taakku marluk nassuiaatigaat piffissami sivitsortumi kommunalbestyrelsimi sulinerminni qinikkatut ataatsimoorfeqannginnertik ersarissigaluttuinnarsimasoq, taamatuttaaq suleqatigiilluni pilersaarusioqatigiissinnaaneq amigaatigisimagitsik.
- Suleqatigiinneq siunnerfeqaqatigiinnertalik amigaataagaluttuinnarsimavoq, tamakku tunngavigalugit nukiit siunertaqarnerusumut pimoorussilluni angusaqarniarnissamut atornissaat kissaatiginarsigaluttuinnartoq misigisimagatsigu, taakku nassuiaapput.
- Siumumi ileqqorisarsimasarput ataatsimoorfeqarneq suleqatigiillunilu siunnerfeqaqatigiinneq tassa amigaatigileraluttuinnarsimavarput, aalajangernermilu uani tunngaviit pingaarnersarigunarpaat, taakku partiimit Siumumit aninissaminnik aalajangernertik pillugu nassuiaapput.
Kommunalbestyrelsimit tunuassanngillat
Partiimit Siumumit anisut taakku marluk qinikkatut sulinertik unitsissanagu aalajangersimapput:
- Ajuusaaraluarluta neriulluarpugut piffissami aggersumi suli qinikkatut sulinissatsinni naammassisaqarluarumaarluta ilissi qinersisartut pillusi, ilissinnummi inuppalaarluta sullissineq nuannaraarput angusaqarusuttuartuullutalu ajunnginnerpaamik inuuneqarnissarsi pillugu.
Taakku marluullutik erseqqissaatigaat qinikkatut attaviitsutut ingerlaqqaarallassallutik.
Partiiminnit aninerminnut tunngatillugu Siumumut allakkatigut nassuiaamminni taakku tigussaasunik ajornartorsiutinik aninissaminnut aalajangiisuusumik tikkuagaqanngillat.
Simon Simonsen kommunalbestyrelsimi sulinermi saniatigut aamma Inatsisartuni Naalakkersuisunilu Siumut sinnerlugu siusinnerusukkut ilaasortaanikuuvoq.
Partiimit anisut sukumiinerusumik paasisasaqarfiginiassallugit aammalu partiip siulittaasua pisoq pillugu oqaaseqartinniassallugu Sermitsiaq.AG-mit sulissutigaarput.