Kujataa aqqummik pisariaqartitsivoq
Kommune Kujallermi ilungersorput Narsarsuarmiit Danmarkimut aqqutip ingerlaannarnissaa anguniarlugu. Tamanna sammisat pingaarnersarissavaat sapaatip akunnera tulleq angallanneq pillugu isumasioqatigiittoqalerpat.
Politikerit, takornarialerisut inuussutissarsiortullu allat sapaatip akunnera tulleq Qaqortumi katersuutissapput, tassani angallanneq pillugu isumasioqatigiissapput imarpik ikaarlugu timmisartuussisarneq sammineqangaatsiartussaassalluni. Isumasioqatigiinnermi peqataassaaq attaveqaqatigiinnermut naalakkersuisoq Jens B. Frederiksen.
– Kommune Kujallermiit nuannaarutigeqaarput, naalakkersuisunut ilaasortap peqataanissaa. Minnerunngitsumik neriulluarfigeqaarput, naalakkersuisunut ilaasortap akuersaarumassagaa imarpik ikaarlugu attaveqarneq siunissami kiffartuussinissamut isumaqatigiissuteqartarnerni ilanngunneqartalissasoq, taama oqarpoq Kommune kujallermi borgmesteri Simon Simonsen.
– Toqqaannartumik attaveqarunnaarutta, kujataanut tamarmut annertoorujussuarmik kingunerluuteqartussaavoq aamma kommunitsinni innuttaasunut naammaginnanngilluinnartumik ajornerulersitsisussaavoq. Taamaattumik naalakkersuisunik qanimut suleqateqarnissarput pisariaqartipparput, imarpik ikaarlugu attaveqaatip qulakkeerneqarnissaanut aamma nunap immikkoortuanut tamarmut iluaqutaaasumik angallannerup iluani ataqatigiilersitsinissamut, taama Simon Simonsen oqarpoq.
Jens B. Frederiksen aamma Air Greenlandimeersoq Bent Hansen isumasioqatigiinneq aallarnerlugu saqqummiussissapput, tamatuma kingorna peqataasut allat siunissami angallannerup siunissaa pillugu kissaatiminnik saqqummiussaqarumaarput.
Air Greenlands pisortaanerata Michael Binzerip Kujataani angallanneq aamma iserfigitsiarpaa pingasunngornermi ualikkut toqqaannartumik allaqattaannermi.
– Siunissami kujataa angallavigerusupparput. Pitsaasumik ingerlakkusupparput, taamaasillutik Kujataamiut Kalaallit Nunaat sinneranut attaveqarsinnaatilerlugit - aammalu Islan-imut Danmarkimullu, taama Michael Binzer chatte-imi oqarpoq.
– Pilersaarutigaarput ukiuunerani Narsarsuaq-Kangerlussuaq-København aqqutigalugit sapaatip akunneranut marloriarluni attaveqartarnissa aasaaneranilu Narsarsuup Københavnillu akornanni toqqaannartumik timmisartuussisassaagut. Naatsumik oqaatigalugu: periarfissat amerlanerulissapput. Neriuppugut allannguut malugissanngikkit. Nunattami sinneraniit aamma Kangerlussuaq aqqusaarlugu angallapput. Naatsumik oqaatigalugu aasaanerani timmisartuussineq akikinnerulissaaq ukiuuneranilu periarfissat amerlanerulissallutik.
– Kujataamiut amerlanerusoriarlutik timmisartuussiffigineqassapata aningaasat amerlanerusut nerriviup qaavanut ilineqartariaqarput.
– Aningaasaqanngippat pisiniarfeqarsinnaanngilaq - imaluunniit kiffartuussinermut isumaqatigiissut nutaamik taarserneqartariaqassaaq. Air Greenland tassaavoq iluanaarnissaq siunertaralugu ingerlasoq ingerlatani atorlugit isaatitsiniartussaq, taamaattumik Kujataani timmisartuussineq allannguiffigineqarpoq, Binzer akivoq.