Kujataani kommunit angallannikkut pissutsit namminersuutigai
Kommune Kujallermi angallannikkut ataatsimiitsitaliap siunnersuutigaa siunnersortumik Kalaallit Nunaata Kujataani ataatsimoortumik angallannikkut aaqqissutissamik siunnersuusiortussamik atorfinitsitsisoqarnissaa.
Kalaallit Nunaata Kujataani kommunit maanna naammagittarunnaarput. Nunap immikkoortuani tamaani angallannermut ataatsimiitsitaliap aningaasaqarnermut ataatsimiitsitaliamut innersuussutigaa siunnersuisussamik angallannikkut ataatsimoortumik aaqqiissutissamik siunnersuusiortussamik atorfinitsitsisoqarnissaa, umiarsukakkut timmisartukkullu Kalaallit Nunaata kujataani angallanerit tamaasa eqqarsaatigalugit.
Angallannikkut pilersaarutikkut nutaakkut illoqarfiit nunaqarfiillu angallannikkut pitsaanerumik akikinnerusumillu ukioq naallugu periarfissarissaarnerulernissaa qularnaarniarneqarpoq, innuttaasunut inuussutissarsiornermillu ingerlatsisunut. Taamak angallannermut ataatsimiitsitaliami siulittaasoq Annassi Kleist Karolussen IA-meersoq borgmesterinngortussarlu Simon Simonsen Siumut, oqarput.
Timmisartukkut akit qaffasinnerujussuata angallannikkullu aaqqissuussaanerup naammaginanngilluinnartup kujataata kommuniata aningallannermut ataatsimiitsitaliaat sulisikkusulersissimavaa.
- Uagut kalaallit nunaata kujataani aaqqiissutissamik massakkut nassaarniarnissap isumaqatigiissutiginissaa pingaarluinnarpoq, Annassi Kleist Karolussen oqarpoq.
Kujataata kommuniani borgmesterinngortussaq Simon Simonsen qanittukkut Islandimiippoq, timmisartukkut angallannerup tungaatigut suleqatigiissutreqartoqarsinnaanersoq paasisassarsiorluni.