Kujataani nunap sajunnera sakkortungaatsiartoq
Nanortalimmi innuttaasut arlallit nunap sajunnera arfininngormat malugaat.
Nanortalimmi nunap sajunnera malugineqarsimasoq Sermitsiaq.AG-imi atuartartutta arlallit saaffiginnissutigaat.
Ilisimatuup Trine Dahl-Jensenip, De Nationale Geologiske Undersøgelser for Danmark og Grønland-imeersup (GEUS) nunap sajussimanera uppernarsarpaa. Nunap sajunnera sakkortungaatsiarsimasoq nassuiarlugu.
Nunap sajunnera pivoq arfininngormat nalunaaqutaq 13.26:
- 1970-ikkut missaaniit nunap najunneri Richterskala malillugu 4 qaangerlugu nunap sajuttarnerit Kujataani qulit missaaniipput. Una kingulleq 4.5-imi inissisimasoq annertunerpaanngilaq, Kalaallit Nunaannilu nunap sajunnerisa annersaasa ilagaat, Trine Dahl-Jensen Sermitsiaq.AG-imut paasissutissiivoq.
Taassumallu naqissuserpaa nunarsuaq tamakkerlugu nunat sajuttarneri taama annertutigisut ullut tamaasa pisartut.
Nanortalimmi innuttaasut arlallit Narsarsuamilu ataatsip nunap sajunnera GEUS-imut nalunaarutigaat.
GEUS-ilu saaffiginnissutit suli amerlanerusut pissarsiarisinnaallugit oqaatigaat. Nalunaaruteqarniaraanni GEUS-ip nittartagaanni kalaallisut danskisulluunniit nalunaaruteqartoqarsinnaavoq.