Kujataani: Timmisartut arlallit takuneqartut
Aappilattuni, Narsarmijini Qaqortumilu innuttaasut arlallit timmisartut arfineq-marluk inissititerlutik qulaaqquttut ullaap tungaa takuaat. Timmisartut tusaaneqarsinnaasimapput marloriarlutillu qulaaqqussimallutik.
Stine Mouritzen pingasunngornerup ullaani allanarluinnartumik takusaqarpoq. Nunaqarfik qulaallugu timmisartut arfineq-marluk inissititerlutik timmisut Stinep takuai.
- Nipaatsumi najugaqarpugut, illup iluaniikkaluarluta tusaavagut. Timmisartut arfineq-marluk inissititerlutik qulaaqqupput, taava tullii sivitsulaarmat aamma qulaaqqupput. Tassa nipi, nipitoqaat, Narsarmiuneersoq, Stine Mouritzen oqaluttuarpoq.
Stine Mouritzen kisimiilluni timmisartunik takunnittuunngilaq. Timmisartut inissititerlutik timmisut arlaleriarlutik qulaaqquttut, Aappilattuneersup Angaju Manassenip oqaluttuaraa.
- Pingasoriarlutik qulaaqqupput, kingulliit takulaarpagut, kisianni qulisimaleratta. Tamarmik inissititeqqallutik ingerlaarput. Alutornaqaaq, neriuppunga timmisartut taakkua angerlamut ingerlaaginnartut, Angaju Manassen oqarpoq.
Canadami timmisartunik nakkutilliisut akisussaaffigaat
Naviair Nunatsinni timmisartunik nakkutilliisuupput, timmisartullu takuneqartut pillugit Sermitsiaq.AG-p Naviair attavigaa. Kujataani timmisartut qulaaqquttut 6 kilometerit sinnerlugit portussusilimmi timmimmata Naviair-ip timmisartut pillugit paasissutissaateqanngilaq.
- Silaannarmi 6 kilometerit sinnerlugit portussuseqartumi timmisartut timmisut Canadami timmisartunik nakkutilliisut(Sector Gander Oceanic) akisussaaffigaat, Naviair-imi attaveqaqatigiinnermi pisortaq, Randi Baasch Sermitsiaq.AG-mut oqarpoq.
Inuit attaveqaqatigiiffiinni amerikamiut timmisartuisa Europamut sorsugiarnissaminnut piareersartut aarleqqutigalugu oqallisigaat. Ruslandip Ukrainillu akornanni isumaqatigiinngissuteqartoqarnera pillugu maanna amerikamiut akulerupput. Kujataani timmisartut inissillutik qulaaqquttut sumik siunertaqarnersut Naviair-ip aamma paasissutissiissutigisinnaanngilaat.
- Danskit kalaallillu timmisartunik nakkutilliisoqarfianiit timmisartut sumut atorneqassanersut oqaatigineqarsinnaanngilaq, paasissutissanik Naviair aamma peqanngilaq. Taamatullu paasissutissanik Sermitsiaq.AG-mit ujartorneqartunik Naviair tunniussisinnaanngilaq, Randi Baasch oqarpoq.
Annertunerusumik innuttaasut paasisaqassappata Canadami timmisartunik nakkutilliisut attavigineqassasut, Naviair innersuussivoq.