Inuiattut ullorsiorneq
Kujataani tusarnaartitsinerit arlallit
Kujataani 'Ullortuneq Festivali' ingerlanneqaleruttorpoq, nipilersortunillu tusarnaartitsisorpassuaqassaaq
Kommune Kujalleq tusarnaartitsinernik arlalinnik ulluni makkunani aaqqissuussivoq. Tusarnaartitsinerit pingasunngornermi juunip 17-iani aallartipput. Aaqqissuussinerit juunip 23-ani naggaserneqassapput.
Erinarsortartoq atuakkiortorlu Juaaka Lyberth, Kujataani nipilersoqatigiit nuannarineqarnerpaartaannik Siku Jamimik nipilersoqateqarnermi saniatigut kisimiilluni tusarnaartitsissaaq, tamannalu Narsami, Nanortalimmi, Alluitsup Paani Qaqortumilu pissalluni.
Festivalimi nipilersoqatigiit allat, Kimia, Simon & Noah & Richard, Nanda (Ninja), Jesper Grønkjær, Maritha & Juuna, aamma Nive & Charlie, Narsami, Qaqortumi Nanortalimmi tusarnaarneqarsinnaassapput. Nipilersoqatigiit festivalip ingerlanerani sumiiffinni assigiinngitsuni paarlakaajaallutik tusarnaartitsissapput.
Inuiattut ullorsiornermi juunip 21-ani Juaaka & Siku Jam, aamma Kimia, Nanortalimmi silami tusarnaartitsisussat akornanniipput.
Ullortuneq Festivali Kommune Kujallermi sunngiffimmi ingerlatsisunit Simon Simonsen siuttoralugu aaqqissuunneqarpoq.