Kujataanit atlantiku ikaarlugu timmisartoq angumerinngitsoorpaat
Kujataani marlunngornermi silarlunnerata nassataanik ullumikkut Narsarsuarmit timmisartup Kangerlussuaq tikissinnaanngilaat taamallu Københavnimut ingerlarusuttut akornuserlugit
Naak sila pissutsillu allanngulertorsinnaagaluartut Air Greenlandip maanna aalajangiuppaa Kujataani silarlunnera pissutigalugu, marlunngornermi Narsarsuarmit Kangerlussuarmut Dash-imik timmisartuussinerit taamaatiinnartariaqartut, taamallu Københavnimut aqqummik angumeqqussinnaanatik.
Taamak nalunaaruteqarpoq Air Greenlandimi attaveqaqatigiinnermik sulialik Pia Christensen Bang, Sermitsiaq.AG-mut nal. 08.15 miss.
- Pissutsit allanngorartuarput sulisutta silap pissusia malinnaaffigaat silamillu ilimasaarutit malinnaaqqissaarfigalugu. Maannakkorpiaq oqaatigisinnaavara Kujataani timmisartuussinerit sumiiffimmi silarluppallaarnera pissutigalugu ualimut kinguartinneqartut.
- Maannakkorpiaq Nuummit Kangerlussuarmut timmisartuussinerit pilersaarutit naapertorlugit ingerlanneqarsinnaapput, kisianni sila allanngoraannaavikkami taamaattumik ilaasussanut kaammattuutigissavara nittartagarput malinnaaffigiinnaqqullugu ”Flyinformation”, Pia Christensen Bang oqarpoq.