Kukkorujussuarneq: Meeqqat pingasut qaqorsaammik imernerup kingorna uninngatinneqarput

Meeqqat pingasut sisamaniit arfinilinnik ukiullit Sisimiuni peqqissaavimmi uninngapput.

- Meeqqat allallu qaqorsaammik imersimammata nakorsiartarfimmut sianerpugut. Nakorsap aalajangiinissaa utaqqivarput paasisaqarneruguttalu sianerfigeqqissavatsigit.

Angajoqqaat amerlanersaasa meeqqatik paaqqutarineqarnerisa nalaanni meeqqerivimmit taamatut kalerrinneqarnissaq takorloorsinnaanngilaat.

Taamaakkaluartoq Larissa Brandt, Bettina Frederiksen aamma Vivi Berthelsen ataasinngornermi ullup-qeqqata siorna taama nalunaarfigineqarsimapput.

Meeqqat taakkua — niviarsiaraq arfinilinnik ukiulik, nukappiaraq sisamanik ukiulik nukappiararlu tallimanik ukiulik — ulloqeqqasiornerup nalaani sulisunit kukkunikkut qaqorsaammik imerfiinut tunineqarsimapput, imersimallutillu.

- Taama tusarlerneqarluni ajorpoq. Tupaqqavunga, paasinngilaralu sulisut qanoq ilillutik imermik eqqiaanermullu atortumik kukkullutik paarlaassisinnaanersut, Larissa Brandt, niviarsiaqqamut arfinilinnik ukiulimmut anaanaq oqaluttuarpoq.

Pania ajunngilaq, nakorsat naliliineri naapertorlugit taassuma eqqiaassut iisimanngilaa.

Nakkutiginninneq immaqalu Napparsimmavissualiaanneqarneq

Vivi Berthelsen nukappiaqqamut eqqiaanermut atortumik imingaatsiarsimasumut tallimanik ukiulimmut anaanaavoq. Qaqorsaat erruinermut atorneqartussaq 12-i sinnerlugu ph-værdi-qarpoq, tassa qanermi nuammit marloriaammik annertunerusumik ph-værdeqarluni.

- Meeqqerivimmit sulisunit sianerfigineqareerlunga, meeqqeriviup tungaanukarlunga ambulancet meeqqerivimmukartut takuakka. Meeqqat pingasut ambulanceni ilaaqatigaakka. Suut tamarmik paatsiveerusimaarnarput, meeqqat qanerminnik anniarlutillu meriartarput. Qujanaqaaq meeqqat qaqorsaammik iisineranit ajornerusumik pisoqanngimmat, Vivi Berthelsen oqaluttuarpoq.

Vivi Berthelsenip Bettina Frederiksenillu erneri misissorneqarnissaq siunertaralugu Dronning Ingridip Napparsimmavissualiaanneqassanersut nakorsat naliliinissaat maanna utaqqineqarpoq.

- Meeqqavut Nuummi peqqinnissaqarfimmi sulisunit iggiamikkut misissorneqarpata toqqissisimanerussagaluarpunga. Maani peqqissaavimmi taamaaliortoqarsinnaanngilaq, naluarpullu qanoq ajoqusersimatiginersut, Vivi Berthelsen oqaluttuarpoq.

Anaanaasut pingasut aallaavigalugit meeqqat maanna ajunngillat. Ataasinngornermi ualikkut marlunngornerullu unnuaani meeqqat qarngi toqqusaavilu salinneqaqattaarput, ilaallu meriartarsimallutik.

Imeqarsimanngitsoq

- Siusinnerusukkut paasitinneqarpugut imermik dunkinut pissarsisinnaasoqartillugu meeqqerivik ammassasoq. Ippassarli pisup kingorna meeqqerivik matuneqarpoq, Bettina Frederiksen, nukappiaqqamut sisamanik ukiulimmut aamma napparsimmavimmiittumut anaanaasoq, oqarpoq.

Oqaluttuarpoq meeqqerivimmi sulisut sianermata iliuusissaarullunilu annilaangasimalluni.

Aamma oqaluttuarpoq meeqqeriviup sulisui marluk meeqqami inaanut dunkinik angisuunik marlunnik imeqarsinnaasunik nassarlutik isersimasut takusimallugit.

- Paasitinneqarnikuuvugut eqqiaassutissat tamarmik meeqqerivimmi parnaaqqasumiitinneqartartut. Eqqarsaatigeqaarali qanoq isilluni erruinermut qaqorsaat dunkiusoq meeqqama inaanut pisimassanersoq. Suli nassuiaaffigineqanngilagut, Bettina Frederiksen oqarpoq.

Meeqqerivik maanna matoqqatinneqarpoq

Meeqqat pingasut napparsimmavimmiittut angajoqqaavi oqarput paasilluarsinnaallugu kukkusoqarsinnaasoq.

- Kukkusoqarsinnaanera paasisinnaavarput, kisiannili kukkuneq manna annertuvoq. Soorunami kamappunga, aammali paasisinnaavara sulisup meeqqatsinnut qaqorsaammik tunniussisup kukkunini aliasuutigisimassagaa, Larissa Brandt oqarpoq.

- Soorunami eqqarsaatigaara meeqqakka meeqqerivimmut tunniuteqqissanerlugit, kommunili meeqqerivillu ingerlaannaq iliuuseqarsimammata isumaqarpunga toqqissisimallunga meerara sumiiffimmut tassunga tunniussinnaallugu, Vivi Berthelsen oqarpoq.

Qeqqata Kommuniani meeqqeriveqarfinni aqutsisoqarfik oqaaseqartinniarlugu Sermitsiaq.AG sulissuteqarpoq.