Kukkunersiuinermut ataatsimiititaliap inissitsiternissaa
Inatsisartut siulittaasuata Kristian Jeremiassen, Siumut, piumaffigaa kukkunersiuinermut ataatsimiititaliami sivisunerpaamik ilaasortaasimasutut inissitsinernissamut ataatsimiigiaqquseqqullugu
- Ullumi Kristian Jeremiassen oqaloqatigisimavara malugeqqullugulu Kristian Jeremiassen nammineq tassaammat kukkunersiuinermut ataatsimiititaliami sivisunerpaamik ilaasortaasimasutut ataatsimiititaliap pilersinneqarnerata kingorna sapaatip akunnera ataaseq qaangiutsinnagu kukkunersiuinermut ataatsimiititaliami inissititernissamut ataatsimiigiaqqusisussaq, Inatsisartut siulittaasuat Josef Motzfeldt tusagassiuutitigut nalunaaruteqarluni allappoq..
Oqaaseqaat saqqummiunneqarpoq ippassaq sisamanngornermi Kristian Jeremiassen Sermitsiap nittartagaani Kukkunersiuinermut ataatsimiititaliap suli inissitsitersimannginnera ernumassutigalugu oqaaseqaateqarneranut akissutitut.
- Peqatigitillugu kaammattorpara kukkunersiuinermut ataatsimiititaliap allattoqarfianut attaveqaqqullugu, kukkunersiuinermut ataatsimiititaliamut ilaasortassanik nutaanik qinersineq ullunik pingasunik qaangiutiinnartoq ataatsimiititaliap sulinerata unittoornissaa ernummatigisimaguniuk, Josef Motzfeldt allappoq Kristian Jeremiassenip ernummateqarnera paasisinnaanagu.
- Kukkunersiuinermut ataatsimiititaliap Nunatta Karsiata 2010-mut naatsorsuutaanik misissuataarinninnera pissutissaqavissumik suli aallartissinnaanngimmat. Nunatta Karsiata naatsorsuutai suli tamanut saqqummiunneqanngillat, Inatsisartunilu siullermeerlugit oqaluuserineqarnissaata ulloq 13. april, Inatsisartut upernakkut ataatsimiinneranni ullormi ataatsimiiffiusumi kingullermi, pinissaa naatsorsuutigineqarluni, Jodef Motzfeldt nassuiaavoq..
Josef Motzfeldtip ilumoornerarpaa Aningaasaqarnermut Ataatsimiititaliamut aamma Kukkunersiuinermut Ataatsimiititaliamut ilaasortassanik nutaanik ulloq 1. marsi 2001 qinersisoqarmat Inatsisartut suleriaasianni aalajangersakkat nutaat naapertorlugit. Suleriaaseq allanngortinneqanngikkallarmat ataatsimiititalianut pineqartunut ilaasortassanik qinersineq ukiakkut ataatsimiinnermi pisaraluarpoq. Inatsisartut suleriaasiat nutaaq ulloq 1. decembari 2010 atuutilerpoq.
- Uanga Inatsisartut siulittaasuattut suliassaraara isumagissallugu Inatsisartuni ataatsimiititalianilu sulinerup illersorneqarsinnaasumik pilersaarusiorneqarlunilu ingerlanneqartarnissaa, taamaattumillu ullumi Kristian Jeremiassen oqaloqatigisimavara, Josef Motzfeldt nassuiaavoq ilisimatitsissutigalugulu, Nunatta Karsiata naatsorsuutai ileqquusutut 2011-mi ukiakkut ataatsimiinnermi aappassaaneerneqassapput.