Kullorsuarmi aalisagaqarluarnera juullisiorluarnissamik qulakkeerivoq
Ukiut kingulliit ingerlaneranni Kullorsuarmi aalisagaqassutsip ilorraap tungaanut ingerlanera ilutigalugu ilaqutariit aalisartukkormiut, malunnaatilimmik, pisissutissaqarnerulerput- tunissutissatigullu malunniutissaaq.
Kullorsuarmi juullimut tunissutissat amerliinnaratik annertunerulerput. Tamanna ukiut kingulliit Kullorsuarmi aalisarnermik inuussutissarsiuteqarnerup siuariartupiloornerata kinguneraa. Taama oqarpoq, aalisartut piniartullu peqatigiiffianni siulittaasutut qinigaaqqittoq Timotheus Petersen- taassuma oqaatigisai nunaqarfimmi Pilersuisumit ilalerneqarput. Aalisartut piniartullu siuttuata sumiiffinni assigiinngitsuni aalisartut piniartullu peqatigiiffiisa Kalaallit Nunaanni aalisarnerup ineriartornerata eqqummaariffigiuarnissaa kaammattuutigaa.
- Aalisarnermik inuussutissarsiuteqarnerup iluani toornerannguatut inissisimagaluarluta ilaasortarisatsinnut annertuumik akisussaaffeqarpugut. Pingaaruteqarpoq aalisarnerup ineriartornera eqqummaariffigissallugu, taamaalilluta tunuliaquttavut pitsaanerusunik atugaqartissagatsgit. Taamaasiornikkullu umiatsiaararsortut aningaasarsiornikkut atugarisaasa pitsaasuunissaat qulakkiissallugu, taanna oqarpoq.
Ukioq kingulleq aalisartut arlaqartut qamuteralattaarput, sikuniariarmallu ingerlaannaq, iluatsilluartumik, qaleralinnialerlutik. Tamanna pissutaalluni aalisartukkormiut, ukiut siuliinut sanilliullugu, juullimut pisissutissaqarnerulerput.
Ileqqaarnissamut periarfissaq
Ukioq maannali aalisarnikkut pissutsit allaanerulaarput. Aalisakkerivik qaammatit kingulliit marluk matoqqavoq, ilaatigut iluarsartuunneqarnera pissutigalugu. Qujanartumilli piniutinik nutarterineq ukioq manna ukiorlu kingulleq pisoq aalisarnermik inuussutissarsiutilinnut atungarissaartitsisvoq.
Aalisartummi ileqqaagaqalaarnissaminnut periarfissaqalermata. Anginerusunik umiatsiartaarnerup nassatarisaanik aalisarneq kujasinnerusumut nuussinnaanngorpoq, tamaanimi nunaqarfiit allat aalisakkerivii tunitsiviusinnaallutik ammapput, taamaattumillu Kullorsuarmi aalisartut aningaasarsiornerat annerusumik ajornartorsiutaanngilaq. Kullorsuarmi aalisartut piniartullu peqatigiiffiat 50-it missaanni ilaasortaqartoq novembarimi, puisit amiinik tunitsivimmi ikiortaasumut aalisartut puisit amiinik tunisineq saniatigooralugu ingerlassinnajuarniassammassuk, qerititsivimmik tunissuteqarpoq.
Qeqertarsuup Tunuaniit nerisassat
Sumiiffinni amerlasuuni juullimi kalaaliminertornissaq ornigineqarnerusarpoq, Kullorsuarmilu aamma tamanna atuuppoq. Timotheus Petersenip oqaatigaa, juulli qaammatinik arlalinnik sioqqullugu qeritisiviit kalaaliminernik, juullisiutissanik, immerlugit aallartinneqartartut.
Kullorsuarmi aalisartunut nannut neqaanik, puisip neqaanik qilalugaminernillu eqqanaarsanissaq ajornartanngilaq. Namminnerli assersuutigalugu: tuttuminernik, umimmaap neqaanik eqalunnillu pissarsinissaq ajorkusoortippaat, taamaattumillu kujasinnerusumiittunut soorlu Qeqertarsuup Tunuani piniartunut tamakkuninnga paarlaasseqatissarsiortarput.
- Tassa ima: amigaativut nassiuttarpaat, uagullu mattannik akiliisarpugut. Taamaalilluta juullimi ukiutoqqamilu pitsassuarnik kalaaliminiuteqarnissarput qulakkeertarparput, taanna oqarpoq.
Unnuaqeqqaniit juulli
Timotheus Petersen 1983-imi Aappilattumit Kullorsuarmut nuussimavoq, Kullorsuarmilu ileqqulersuutaasartut pigiliussimallugit.
- Kullorsuarmi ileqqulersuutaasartut ilagaat unnuaqeqqaniit angerlarsimaffinni ataatsimoorluni kalaaliminertuuttarneq kingornatigullu inersimasunut meeqqanullu poortukkanik agguaassisiqartarpoq, Timotheus oqarpoq.
Kalaallit Nunaanni sumiiffiit allat assiginagit Kullorsuarmi juulliaqqami ullaaralaakkut makinnissaq pingaartinneqarpallaartanngilaq, tassami innuttaasut unnuarsuarmut kaffisuullutillu tussiutinik atuisarmata.
Sermitsiap juullimi aviisia uani pisiariuk: