Kulusummiuaqqat Københavnimut piareerput
Kulusummi 6. klassimi atuartut Danmarkilialerput silap pissusaa pillugu ataatsimeersuarnermi peqataajartorlutik.
6. klassimi atuartut arfinillit saqqummersitsinermi ’In the Eye of Climate Change’-mi Nordatlantens Bryggemi peqataassapput.
Saqqummersitsinermi qitiutinneqassapput silap pissusaata allanngornerata kinguneranik unamminartut periarfissallu Kalaallit Nunaanni qanoq pineqassanersut Kalaallit Nunaannillu nutaajusumik oqaluttuartuussallutik immikkut sammisatigut soorlu nukissamik piujuaannartitsinikkut, eqqumiitsuliornikkut aamma kulturitigut, taamak oqarpoq sananermik ilinniartitsisoq, Anne-Mette Holm, 60-ileeqqammersoq, Kommuneqarfik Sermersuup nittartagaanut.
Atuartut ilagalugit Islandikkut Danmarkiliassapput pingasunngornermi decembarip 9-ani.
Kulturi annerusumik Kulusummi meeqqanit pingaartinneqassaaq. Saqqummersitsinermut qaaqqusaasimapput ukiup matuma aallartilaarnerani Noap Umiarsuaanik nassuiaasersuisimagamik, tassa Noap Qajaanik taallugu taamanikkut klimaministeriusumut Connie Hedegaardimut. Qajaq meterinik marlungajannik angissuseqarpoq. Ilaapput issittumi uumasut. Marlukkaarput, qaavani angutivissat arnavissallu, Noa annoraalerluni kamilerlunilu uppimmik tigummiartoq, uumasut qajaq aquppaat ulersuarnermi annallutik.
Saqqummersitinermi sanaluttarfimmi meeqqat isumassarsiullaqqissutsiminnik assassullaqqissutsiminnillu takutitsissapput.
- Inuit kulturiat aallaavigalugu, Tunumi naasut uumasullu, taamatut takutinniarparput qanoq nuna alutornarluinnartoq nunagineripput, angerlarsimaffipput nunarsuarmioqatitsinnullu amerlasuunik tunniussassaqarnersugut paasikkusullugu, Anne-Mette Holm oqarpoq.
Københavnimi Nordatlantens Bryggemi saqqummersitsineq ’In the Eye of the Climate Change’ pisortatigoortumik Kronprins Frederimmit aamma Naalakkersuisut siulittaasuannit Kuupik Kleistimit ammarneqassaaq. Kikkunnit tamanit takuniarneqarsinnaassaaq decembarip 12-anniit 20-ata tungaanut.