Kunnginngortussat tulleriiaarnerannut inatsit nunatsinni taasissutigineqassaaq
Kunnginngortussat tulleriiaarnerannut inatsit innuttaasunit taasissutigineqassaaq juunip 7-anni. Nunatsinni aamma taasissaagut, tamannalu landskarsimut immikkut aningaasartuutaassaaq, knr.gl allappoq.
Kunnginngortussat tulleriiaarnerannut inatsit Kalaallit Nunaanni 7. juuni 2009 taasissutigineqassaaq. Danskit naalagaaffianni innuttaasut taasisinneqassapput naalagaaffiup kunnginngortussat tulleriiaarnerannut inatsisaata allanngortinneqarnissaa pillugu. Innuttaasut aalajangissavaat kunnginngortussani arnat angutillu naligiisinneqassanersut.
Innuttaasut taasisinneqarnerat nunatsinni landskarsimut immikkut 100.000 koruunit missaannik aningaasartuutaassaaq.
- Tamatumalu missingersuutit iluanni ingerlanneqarnissaa ilimanarpoq. Ukioq manna 600.000 koruunit qinersinissanut immikkoortinneqarput, taakkulu amerlanersaat inatsisartunut qinersinissamut atorneqassapput. Kisianni innuttaasut taasisinneqarnerat aappimik imaluunniit naamimik taamaallaat akisassaq akikinneerarsuuvoq, Hans-Erik Bresson Radioaviisimut oqarpoq.
Kunnginngortussat tulleriiaarnerannut inatsit aatsaat atortuulersinneqassaaq taasisinnaasut tamakkerlutik 40 procentii allanngortinneqarnissaanut oqarpata "aap".