Kunngissap Kalaallit Nunaat ernumagaa
Silaannaap allanngoriartorneri Kalaallit Nunaannullu kingunissai kunngissap Frederik-ip isumaaniipput, taassuma silaannaap pissusaa pillugu naalagaaffiit qullersaasa 2009-mi ataatsimeersuarnissaanni qitiusumik inissisimanissani takorloorpaa.
Kunngissaq Frederikip neriuutigaa, statsminister Anders fogh Rasmussenip silaanaap pissusaanullu ministerip Connie Hedegaardip FN-ip iluanni Københavnimi silaannaap pissusaa pillugu naalagaaffiit qullersaasa 2009-mi Københavnimi ataatsimeersuartitsinissaani qitiusumik inissisimanissaanik kajumissaarumaaraat, jp.dk allappoq.
Maannangaaq silaannaap allanngoriartorneranut tunngatillugu pissutsit ataasiakkaat misissuiffigilereerpai taamalu nunarsuarmi assigiinngitsuni inunnut kingunerisimmaasai eqqarsaatersuuteqarfigalugit, tamanna inummik ilisimatitsitsilluni atuakkiami "Frederik - Danmarkip kunngissaa"-ni ullumikkut saqqummersumi atuarneqarsinnaavoq.
Frederikkip silaannarmut tunngatillugu Kalaallit Nunaat immikkut ernummatigaa.
– Nunarsuup issittortaani siku sallinngortinneqarsimavoq, taamalu ukiut 100-t ingerlaneranni ajalusoorluinnartoqarnissaa siulittuutigineqarluni. Tamanna assorsuaq eqqarsariartitsivoq, kunngissaq Frederik atuakkiortunut Gitte Redder-imutaamma Karin Palshøj-imut oqarpoq.
Silap kissatsikkiartornerata kingunerisaanik nunarsuarmi sumi tamaani immap qaffannissaa kisiat ernumanartoqartiinnanngilaa, kisianni aamma qallunaat nutaata imartaani mingutsitsinerit imerlu nunap iluaniittoq ernumanartoqartippai, taamalu kunngissap mingutsitsinerup akiorneqarnissaa CO2-millu aniatitsinerup akiorneqarnissaa tiguartisimaarfigai.
– Mingutsitsineq avatangiisinillu illersuinissat ukiualunni politikkikkut anguniagaqarluni atorluarneqarsimapput, taamaanneralu ajuusaarnarisinnaasarpara. Kisianni maannakkut silaannaap allanngoriartornerinut tunngatillugu ilisimatuussutsikkut misissuinerit uppernarsaanerillu ima angusaqaataatigilerput maannak avatangiisit silaannarlu politikkikkut oqaluuserineqarnissaat ersigigineqarunnaarsimalerluni, kunngissaq Frederik oqarpoq.